Адет хьанвайвал, йиса кьве сеферда, гатфариз ва зулуз Россиядин Армиядин жергейра къуллугъ авун патал яш тамам хьанвай жегьилар тухузва. Уьлкведин халкьдин майишатдин гзаф хилера хьиз, армиядани хейлин цIийивилер арадал атанва. Йисалай-суз военный частара къуллугъзавай контрактникрин кьадар хейлин гзаф жезва. ИкI ятIани, армиядиз эвер гузвай жегьилрин кьадарни тIимиларзавач. ГьикI лагьайтIа, къе РагъакIидай патан Европади, США-ди, Канадади ва маса уьлквейрини Россиядиз акси сиясат тухудайла, уьлкведихъ къуватлу, къудратлу, гзаф миллетрикай ибарат халкьарин итижар гьар са камуна хуьдай, къенин аямдин яракьралди, ватанперес аскерралди, вини дережадин пешекарвал авай офицерралди таъминарнавай армияни хьун герек я.
Россиядин Яракьлу Къуватрин Генштабдин векил, генерал-полковник Евгений Бурдинскийди хабар гайивал, алай йисан зулухъ, 1-октябрдилай гатIунна, декабрдин эхирдалди армиядин жергейриз 130 агъзурдалай виниз жегьилриз эвер гуда. Вири мярекатар алатай йисарин тежриба фикирда кьуна тухузва, амма тIугъвалди маса истемишунарни ийизва. ИкI, уьлкведин вири комиссариатар медицинадин лазим вири жуьредин шейэралди таъминарнава. Идахъ галаз сад хьиз призывдин пунктариз къвезвай гьар сад начагъ яни, тушни чирун патал ахтармишзава. Сборный пунктара ва фидай рекьерани жегьилар маскайралди таъминарда. Къуллугъдай частариз агакьайла, абур кьве гьафтедин карантинда жеда. Призывникар чкайрал агакьардай транспортни дезинфекция ийизва.
Дагъустан Республикадикай рахайтIа, армиядин жергейриз эвер гузвайбурун кьадар артухарзава. Имни эхиримжи вахтара Россияда кьиле тухузвай сиясатдихъ галаз алакъалу я. Са шумуд йис идалай вилик йисан вахтунда Дагъустандай Россиядин Армиядин жергейриз анжах 1200-1500 кас тухузвайтIа, цIи зулуз Дагъларин уьлкведай армиядиз эвер гузвайбурун кьадар 3500 касдив агакьда.
Дагъустан Республикадин военный комиссар Дайтбек Мустафаева, журналистрихъ галаз гуьруьшмиш хьайила, лагьайвал, республикадин военкоматдин вири отделенийра жегьилар армиядиз желб авунин лазим вири серенжемар пайгардик кваз, истемишзавай къайдада тухузва. Меркездин призывдин пунктуна ва районрин, шегьеррин комиссариатра жегьилрин сагъламвал хуьдай вири серенжемар кьабулнава. Герек кьадар маскаяр, экспресс-тестер, дезинфекция ийидай шейэр ава. Призывникрин пунктар дистанционный термометрийралди, бактерияр рекьидай тадаракралди таъминарнава. Гьарна медицинадин постар кардик ква. Куьрелди, начагъвал квай жегьилар армиядиз ракъур тавуниз талукь вири къайдаяр вилив хуьзва.
Военный комиссарди къейд авурвал, алай вахтунда Дагъустандай физвай жегьилри Россиядин военный вири округра ва гьакI Североморский, Черноморский, Тихоокеанский, Каспийский флотра къуллугъда.
Хийир Эмиров
