Дагъустандин школада кIелзавай аял Вирироссиядин “Зи муаллим” серенжемдин гъалибчи хьанва. РФ-дин просвещенидин министерствода 14-сентябрдилай 10-октябрдалди кьиле фейи Вирироссиядин “Зи муаллим” серенжемдин нетижаяр кьуна.
Къейд ийин, ам Международный муаллимдин йикъаз талукьарнавайди тир. Серенжемда 3 агъзурдалай гзаф аялри ва чIехибуру иштиракна, гъалибчи лагьайтIа, Дагъустандай тир Айша Бутаева хьана, хабар гузва РД-дин образованидин ва илимдин министерстводи.
Уьлкведин майданда тешкилнавай серенжемда иштиракуналди, Россиядин мектебра кIелзавай аялри рикI алай муаллимриз “Инстаграм”, “Вконтакте” ва “TikTok” социальный сетра абурухъ галаз санал янавай шикилар ва я видеороликар чап авуналди, сувар тебрикзавай.
Муаллимриз чпин патай баркалла ва гьуьрмет мектебра кIелзавай аялривай ва абурун диде-бубайривай гьар жуьреда малумариз жезвай: абуру манияр язавай, кьуьлер ийизвай, шиирар кIелзавай. Виридалайни итижлу жуьреда тебрик авур цIуд кас финалдиз акъатна — абуруз гъалиб хьуниз талукь дипломар гуда. КIвенкIвечи чкаяр кьур пуд аялдиз лагьайтIа, пишкешар ганва.
Айша Бутаевади Дербентдин 15-нумрадин СОШ-дин 3-классда кIелзава. Роликда руша муаллим — Жафарова Лариса Алимерзоевна вичиз гьикI аквазватIа, гьикI адаз гьуьрметзаватIа ва адал гьикI рикI алатIа къалурна ва суьгьбетна.
Серенжемда кьвед лагьай чка — Красноярский крайдин ва пуд лагьай чка Астрахандин областдин мектебра кIелзавай аялри кьуна.
Гъалибчийрин яратмишунар конкурсдин нетижаяр кьазвай роликда гьатнава ва Россиядин Минпросвещенидин официальный аккаунтра чапнава.
«Лезги газет»
