Гьаваяр мекьи ва чимивал гудай вахт (сезон) башламиш хьуникди,  яшайишдин кIвалерани квартирайра пичер ва маса алатар ишлемишуникди цIаяр кьунин жигьетдай хаталувал, адет яз, артух жезва. Гьаниз килигна Россиядин Да­гъустан Республикада авай МЧС-дин Кьи­лин Управленидин Махачкъаладин Ленинский районда авай 2-нумрадин гуьзчивалдай ва вилик пад кьунин кIва­лахрин  отделди (ОНД ва ПР) мукъаятвал квадар тавуниз эвер гузва.

Яшайишдин кIвалерани квартирайра чимивал гудай тадаракар, гьа гьисабдай яз гъили гьазурнавайбурни ишлемишуни гзаф вахтара электросетрал гуж акьалтарзава ва проводка ифизва. Нети­жада изоляция кузва ва цIай кьунал гъизва. Эгер чимивал гудай тадаракар иш­лемишзаватIа, квез абурукай менфят къачунин ва абур эцигунин къайдайрал амал ийизни чир хьун лазим я.

—           электричестводин тадаракар анжах­ заводра акъуднавайбур ишлемишиз алахъна кIанда;

—           абур цIай кьун мумкин тир за­тIа­­ралди кIевна, абурал пек-партал кьурурна, патарив цIай кьадай шейэр эцигна виже къведач;

—           куькIуьрнавай тадаракар да­тIа­­­на гуьзчивилик кутуна кIанда, кIва­ляй экъечIдайла, абур токдикай хкудун лазим я;

—           электричестводин тадаракри гзаф ток ишлемишзавайди, идани ­проводкадал гуж акьалтарзавайди ри­кIе­лай ракъурна кIандач. Идахъ галаз сад хьиз, эгер кIвале изоляция кайи ни гьат­на­ва­тIа, электропроводка, ро­зет­ка ифен­ватIа ва я абурун винел пад кана чIу­ла­­вар­на­ва­тIа, электросчётчикдин пре­дохранителар датIана кузватIа ва абур хкатзаватIа — ибур кIва­лин (ва я квартирадин) электросетрал гуж акьалт­завайвилин ва электричестводин тадаракар ишлемишун хаталу тирди тестикьарзавай лишанар я. Абуруз фикир тагуни куь эменни ва кIвале яшамиш жезвайбурун уьмуьрни сагъламвал еке хаталувилик кутазва. ГьакIни михьи та­вунвай гурмагъ, пичинин керпичра ва сувагъда хъиткьерар, патаривни фад цIай кьадай шейэр хьунини еке бедбахтвилел гъун мумкин я.

Мад сеферда рикIел хкиз кIанзава хьи, четин тушир и къайдайрал амал аву­­­налди, квевай кIвал цIай кьунин хаталувиликай хуьз жеда. Ингье абур:

—           чимивал гудай вахт башламишдалди вилик и кар патал ишлемишзавай тадаракрин гьал ахтармишун ва, ла­зим аваз хьайитIа, абур ремонт авун;

—           мукьвал-мукьвал гурмагъ би­пIин­­рикай михьун;

—           пичина кIарасрик цIай кягъун патал бензин, керосин ва ихьтин маса затIар ишлемиш тавун;

—           пичинин рак ачухзаватIа ва адан вилик кун тийидай чар (ам полдал михер яна алкIурнаваз хьун герек я) квач­тIа, ана цIай тун тавун;

—           пичинал гуьзчивал авун аялрал вегьин тавун;

—           пичиниз мукьва чкадал кIарасар ва фад цIай кьадай маса затIар эциг тавун, абур (пичер) гуьзчивиликай хкуд тавун.

РикIелай ракъурмир: мукъаятвал ква­даруни еке бедбахтвилел гъун мумкин я!

Б.Гьажиев,

2-нумрадин ОНД ва ПР-дин дознаватель