Чи ватанэгьлияр — гьар сана

Москвада яшамиш жезвай тIвар-ван авай лезгийрикай сад Россиядин экономист ва общественный деятель, Г.В.Плеханован тIварунихъ галай Россиядин экономикадин университетдин маркетингдин факультетдин декан, “Экономика труда и управления персоналом” кафедрадин профессор, экономикадин илимрин доктор, Россиядин тIебии илимрин академиядин член-корреспондент, Да­гъустан Республикадин илимдин лайихлу деятель, ФЛНКА-дин Советдин член  Асали  Мегьамедалиевич  Асалиев  я.

Ам 1955-йисан 31-майдиз Рутул райондин Хъуьлуьдрин хуьре дидедиз хьана.  Хайи хуьруьн мектеб куьтягьайдалай кьулухъ ада ви­чиз виликамаз бегенмиш хьайи Москвадин халкьдин майишатдин институтдик (гила адаз Г.В.Плеханован тIварунихъ галай РЭУ лу­гьуз­ва) эке­чIун кьетIна. Амма сифте нубатда Яракьлу Кьушунрин жергеда къуллугъ тамамарунин ме­сэла вилик акъвазна. Армияда къуллугъайдалай кьулухъ ам Москвадиз фена, вуздик экечIунин вири имтигьанар “вадралди” вахкана, ви­чин рикI алай пешедай дерин чирвилер къачуна. Вузда адакай лап хъсандиз кIелза­вай студент хьана, ада Ленинан тIва­рунихъ галай стипендияни къачузвай. Далудихъ куьмек гудай кас галачир гележегдин профессор четинвилерай экъечI­на, вичин макьсаддив агакьунин рекье авур ала­хъу­нар бегьер галайбур хьана.

1980-йисуз тафаватлудаказ вуз куьтягьайдалай кьулухъ ада гьа ин­ститутда илимдал машгъул хьун кьетIна. Ина Асали Мегьамедалиевич илимдин гурарай кукIушриз хкаж хьана: 1984-йисуз экономикадин илимрин кандидатвилин диссертация хвена, 1996-йисуз — илимрин докторвилин. Г.Плеханован тIварунихъ галай вуздин милли экономикадин кафедрада кIва­лахай алимдиз 1999-йисуз профессорвилин тIвар гана.

2008-2013-йисара ада вуздин зегьметдин экономикадин ва кардал машгъуларунин кафедрадин заведующийвиле кIвалахна. Чи ватанэгьли алимдин регьбервилик кваз 20-далай гзаф ксари илимрин кандидатвилин, са шумуд касди илимрин докторвилин диссертацияр гьазурна. Аспирантриз илимдин рекьяй регьбервал гунин кIвалахар ада исятдани давамарзава.

Асали Асалиев чIехи алакьунарни агалкьунар авай машгьур  алимрин жергедай я. Адан агал­кьу­нар Россиядин образованидин министерстводин “РФ-дин кьилин пешекарвилин образованидин сейли къуллугъчи” гьуьрметдин лишандалди ва маса гзаф ша­багьралди къейднава. Адахъ гьукуматдин ва финансринни банкарин къурулушра регьбервилин кIва­лахдин чIехи тежрибани ава. Ада технологиядин рекьяй вини дережадин затIар арадал гъунин, абур вилик тухунин кардани иштиракна.

А.Асалиева 2013-йисалай регьбервал гузвай маркетингдин факультет 2013-2014-йисарин нетижайрай вуздин виридалайни хъсан факультет яз гьисабна. И делилдини ам са гъвечIи муддатда метлеблу агалкьунар къазанмишиз, кIвалах тешкиллувилелди ва пешекарвилелди вилик тухуз алакьдай алим тирди успатзава.

Алимдин рикI волейболдал гзаф ала. Студент вахтара ам инсти­тутдин командадик кваз къугъвана. Армияда къуллугъай йисара спортдин рекьяй къалурай агалкьунрай адаз спортдин мастервилин тIвар гана.

Асали Асалиевакай ам мукьувай чидай ксари ФЛНКА-дин сайтда алхишдин келимаяр гзаф кхьенва. Абуру машгьур ватанэгьли халкьдин, уьлкведин чIехи ватанперес, алай девирдин зурба алим, лайихлу инсан тирди къейднава.

«Лезги газет»