И йикъара  дигидай цин “Самур-Дербент” къаналдин Дербент шегьердин мул­кунилай физвай участок, лазим тир махсус техника ишлемишна, зирзибилдикай ва кватI хьанвай лиледикай михьи авунин кIвалахар кьиле тухуз га­тIуннава.

Дербент райондин  чилинни промышленный комплексдин управленидин  начальник Юсиф Герейханован гафаралди, и къанал михьи тавуна са­ки 20 йис хьанва. Проектдин бинедаллаз и къаналдай 8 куб.м. кьадарда­ аваз яд фена кlанза­вайди я. Алай вахтунда лагьай­тlа, анай къвезвайди анжах 1,5 куб. метр яд я. Иниз килигна, Дербент райондин хуьруьн майишатар целди таъминарунин месэла хци хьана. 2018-йисуз районда 500 га чилел уьзуьмар кутадай план ава. Дигидай цин месэла вахтунда гьялунин мураддалди,  Дербент райондин кьилин тапшуругъдалди, и кlвалах башламишнава ва ам са вац­ра давам жеда.

Дагъустан Республикадин Минмелиоводхоздин Дербент районда авай “Самур-Дербент” къаналдин филиалдин регьбер Т.Сурхаеван куьмекдалди къанал михьун патал махсус техника ракъурнава.

И карханадин пешекаррин гафаралди,  къанал михьдайла гьалтзавай асул четин месэла шегьердин тоннелдин къвалавай физвай участок михьун я. Ина кlвалер лап сихдаказ эцигнава ва махсус техника ана ишлемишун четин акъваззава.

Т.Сурхаева и участокда яшамиш жезвай шегьерэгьлийриз михьивал хуьниз ва къаналдиз зирзибил вегьин тавуниз эвер гана.

Къагьриман Ибрагьимов