Чна вичикай къе суьгьбетзавай лацу халатдин сагьиб Рутул райондин Хъуьлуьдрин хуьруьн амбулаторияда 20 йисалай виниз намуслудаказ зегьмет чIугвазвай медсестра Агъамирзоева Залмира Аюбовнади 1989-йисуз Дондал алай Ростов шегьерда медучилище акьалтIарна. Зегьметдин рехъ ада Ростовский областдин азарханада зегьмет чIугунилай башламишна.
Гьа ина ада 1993-йисалди кIвалахна. Кьве йисуз Рутул райондин центральный азарханада зегьмет чIугурдалай кьулухъ ада вичин хайи хуьр тир Хъуьлуьда амбулаторияда медсестра яз кIвалахун давамарзава. Мез ширин, гъил кьезил, ачух чина гьамиша хъвер авай медсестради вичин патав атай вири азарлуяр хушдиз кьабулда. Ада ягъай рапуни, кутазвай системайри, гайи дарманри хьиз, адан хуш рафтарвилини азарлуйриз хъсан таъсирзава, абурун гьал акваз-акваз ачух жеда. Залмирадин кабинетдай азарлуяр чина разивал аваз экъечIда. Адан тIварцIихъ абуру датIана алхишдин гафар лугьуда. Залмиради, азарлу хьанвай яшлу ксарин кIвалериз фена, вичивай жедай куьмекарни гузва. Амбулаториядин коллективди алай вахтунда коронавирусдиз акси серенжемар кьиле тухузва. И барадайни ада еке зегьмет чIугвазва, агьалийрин сагъламвал хуьник вичин пайни кутазва.
Хъуьлуьдвийрин патай гьуьрмет авай чешнелу хизандин кьил, хуьруьн кавха тир Агъамирзоев Геннадинанни Залмирадин туькIвей хизанда 4 аял ( кьве хвани кьве руш) чIехи авуна, кIелиз туна, эвленмишна. Абурухъ гьардахъ вичин кIвал, кIвалах, хизан ава.
Чнани кIвале хъсан кайвани, кIвалахдални вичин везифаяр намуслудаказ кьилиз акъудзавай — инсанрин сагъламвилин къаравулда акъвазнавай медсестра Залмирадихъ чандин сагъвал, кIвалахда мадни еке агалкьунар, хизандани хушбахтвал артух хьун алхишзава.
С.-А.Абдурашидов,
Хъуьлуьд
