Эхиримжи йисара Дагъустан Республикадин бюджет 100 миллиард манатдилай 170 миллиард манатдив агакьдайвал артух хьана, малумарна Владимир Васильева. Алатай ислен юкъуз ада вич региондин кьилин къуллугъдилай отставкадиз ракъурунин патахъай гайи теклиф РФ-дин Президент Владимир Путина кьабулна.
“Са тIимил вахтар идалай вилик чина 100 миллиард манатдиз барабар тир бюджетдин такьатрин кьадар гила 170 миллиард манатдилай алатнава. Им чи саналди тир кIвалахдин нетижа я. Гьи кар кьетIендаказ къиметлу я лагьайтIа, чаз пул къазанмишиз чир хьанва — неинки кьенят ийиз ва саламатдиз хуьз, гьакI къазанмишиз чир хьанва”, — лагьана ада РФ-дин Президентдихъ галаз дистанционный къайдада гуьруьш кьиле физвай чIавуз.
В.Васильева мадни къейд авурвал, Дагъустанда гьуьлуьн портунай яна дашмишзавай нафтIадин кьадар и йисара кьуд сеферда, суьрсетдин кьадар пуд сеферда артух хьана. Идалайни гъейри, адан гафаралди, республикада са жерге маса рекьерайни хъсанвилихъ виле акьадай хьтин дегишвилер хьанва.
«Лезги газет»
