И йикъара чи илимдин общественностдив еке магьрумвал агакьна. Яргъалди чIугур залан азардикди филологиядин илимрин доктор, ДГУ-дин профессор, лезгийрин ва гьакI Дагъустандинни литературадин илимдик еке пай кутур бажарагълу алим Рагьимхан Мурадович Кельбеханов рагьметдиз фена.
Р.М.Кельбеханов 1936-йисуз къадим Дербент шегьерда дидедиз хьана. Ина юкьван школа, ДГУ-дин филологиядин факультет, гуьгъуьнлай аспирантура, докторантура акьалтIарна. Чи классикар тир СтIал Сулейманан, Алибег Фатахован, Хуьруьг Тагьиран яратмишунар дериндай ахтармишна, кандидатвилин, докторвилин диссертациярни гьабурун бинедаллаз арадал атана.
Рагьимхан Мурадович хайи чIалал ва литературадал бинедилай ашукь кас тир. Адахъ гьакI Урусатдин ва дуьньядин литературайрайни дерин чирвилер авай. Вичини лап жаван чIавалай художественный эсерар яратмишзавай, устадвилелди кIелни ийидай. Ихьтин бажарагъди ва устадвили ам вичи тарс ва тербия гузвай студентризни рикIивай мукьва авуна, вуздин преподавателрин, аспирантрин арадани адахъ кьетIен гьуьрмет ва авторитет авай. Кандидатвилин ва докторвилин диссертацияр хуьдайла алимрин советрал, илимдин заседанийрал адан гафунин къуват артух жедай. Ада вичини са шумуд цIуд кас илимдин кандидатар ва докторар тербияламишна, гьа жергеда адан руш, илимрин кандидат Мадина Рагьимхановнани ава.
Рагьимхан Мурадовичан рикIик хъийидай крар гзаф квай. Амма залум ажалдин вилик пад кьаз жедач.
Эхь, чавай еке дуст, алим, гьамиша гьахълувал хуьз алакьай кьегьал хва къакъатна, ам чидай вирибуру, иллаки жегьилри адахъ яс чIугвазва.
Чна рагьметлудан хизандиз, вири багърийриз башсагълугъвал гузва. Рагьимхан Мурадович Кельбеханован экуь къамат чи рикIелай садрани алатдач.
«Лезги газет»
