30-январдиз Дагъустандин Кьилин везифаяр вахтуналди тамамарзавай Владимир Васильева ва “Газпром” ПАО-дин правленидин председателдин заместитель Валерий Голубева компаниядин регионриз талукь сиясатдай Комиссиядин гегьенш заседание кьиле тухвана.
Совещанидин кIвалах башламишдайла, Владимир Васильева газдин турбаяр авай гьалдиз, абур нин хсусиятда аватIа, гьадаз ва абурун патарив законсуздаказ капитальный эцигунар авуниз талукь месэлаяр хьиз, газдалди таъминарунин ва газ санай масаниз агакьарунин кIвалах ерилудаказ тамамарунин месэлаярни важиблубур тирди рикIел хкана.
Вири и месэлайрикай тамамдаказ “Газпром трансгаз Махачкала” ООО-дин генеральный директор Александр Астанина лагьана. Адан гафаралди, компанияди алай вахтунда республикадин 29 район ва шегьеррин 10 округ газдалди таъминарзава. 2017-йисуз 3,8 миллиард кубометр кьван газ агакьарна.
Ада Дагъустан Республикадин ва “Дахадаевский район” МО-дин хсусиятда газ агакьарунин къурулушдик акатзавай шумуд объект аватIа, гьадакай лагьана, абур ишлемишунин шартIарикай суьгьбетна.
Къейд авурвал, къенин йикъан делилралди, республикадин хсусиятда вад газопровод-отвод ва АГРС (газ пайдай станция) ава. Компаниядин генеральный директорди совещанидин иштиракчийриз Дахадаевский райондин администрацияди газдалди таъминардай объектар республикадин хсусиятдиз вахкунин мумкинвилиз килигуниз эвер гана. Идалайни гъейри, тариф (къимет) хуьнин, гьакIни газдалди таъминаруниз ва технический рекьяй къуллугъ авуниз талукь икьрарар кутIунунин жигьетдай кьиле тухузвай кIвалахдикай рахана.
Газдин турбайрин патарив гвай чкайрал капитальный объектар ва яшайишдин кIвалер эцигунин месэладикай Александр Астанин кьилди рахана. Малум хьайивал, Дагъустанда ихьтин 929 дуьшуьш дуьздал акъуднава, абурукай 682 — кьилдин ксарин яшайишдин кIвалер, 247 капитальный дараматар ва тадаракар я. Ихьтин объектар эцигнавай дуьшуьшар дуьздал акъуднавай чкайрин сиягьда Хасавюрт, Къарабудахкент, Къаякент, Мегьарамдхуьруьн районар, гьакIни Махачкъала, Къизилюрт шегьерар ава.
“И месэлада къайда тун патал чна истемишунрин (исковый) 300-далай артух арзаяр суддиз рекье тунва, абурукай 260-даз талукь яз разивилин къарар кьабулнава”, — хабар гана компаниядин гендиректорди.
Заседанидин сергьятра аваз гьакIни газдалди атIунар авачиз таъминарунин ва газ санай масаниз агакьарунин, ишлемишнавай газдин гьакъи вахт-вахтунда гунин къайда мягькемаруниз, гьакIни яшайишда жезвай кIеви амукьаяр тергдай махсус майданар (полигон) туькIуьруниз талукь месэлаяр веревирдна.
РД-дин Кьилин ва Гьукуматдин Администрациядин пресс-къуллугъ
