Мукьвара чав Москвадай фадлай вилив хуьзвай шад хабар агакьна. Россиядин Федерациядин милли литератураяр хуьнин рекьяй махсус Программадин тешкиллувилин комитетди “Россиядин халкьарин аялрин литературадин антология” кьил ганвай чIехи ктаб чапдай акъуднава. Ана чи уьлкведин милли чIаларал 1990-йисалай инихъ аялар патал яратмишнавай эсерар гьатнава. Ктаб Общественный гуманитарный чапханади (ОГИ-да) гьазурна, майдандиз акъудна.
ТIвар кьунвай ктаб алай аямдин Россиядин халкьарин милли литературайрин антологияр чап авунин жигьетдай къачунвай нубатдин кам я. Ина чи уьлкведин саки вири халкьарин милли культурайриз хас лишанар: шикилар, шиирар, гьикаяяр, чIалан кьетIенвилер — ишлемишнава. ТуькIуьр хьунал гьалтайла, ам вичихъ гекъигун авачирди хьанва. Яни ихьтин ктаб Россиядин тарихда сифте яз чапдай акъуднава.
Антологияда 201 авторди кхьенвай чи уьлкведин 55 милли чIалал 870 эсер гьатнава. Ам гьазурун патал 800 касдилай гзаф инсанар желбнавай.
ТIвар кьунвай ктабда лезгийрикай 5 автордин — Сажидин Саидгьасанован, Мердали Жалилован, Абдуселим Исмаилован, Пакизат Фатуллаевадин ва Арбен Къардашан эсерарни гьатнава. Ина гьакI Арбен Къардаша лезгийрин аялрин литература арадал атуникай ва адан тарихдикай кхьенвай макъалани ава.
«Лезги газет»
