Кьасумхуьруьн 3-нумрадин аялрин бахча 1941-йисуз эцигай куьгьне дараматда кардик кватIани, кIвалах тешкилунин хъсан къайда ва михьивал хьунин жигьетдай анаг школада кIелдай вахтунилай вилик квай яшдин аялрин хъсан идарайрин жергеда ава. И йикъара аялрин бахчадиз фена, ана кIвалах тешкилнавай гьалдихъ галаз таниш хьайила, чунни и кардихъ инанмиш хьана.
Идарадин пешекарри ва бицIекрин диде-бубайри ана хъсанвилихъ хьанвай дегишвилер сифте нубатда бахчадин заведующий Аминова Раиса Надировнадин тIварцIихъ, адан чалишмишвилерихъ галаз алакъалу ийизва.
Р. Аминовади 2007-йисуз Дагъустандин госуниверситетдин филологиядин факультет акьалтIарна, Махачкъалада аялрин бахчада тербиячивиле, Избербаш шегьерда йисан кьиляй-кьилиз кардик квай лагерда урус чIалан муаллимвиле, Сулейман-Стальский райондин администрациядин сайтдин корреспондентвиле кIвалахна.
2017-йисан 1-апрелдилай Раиса Надировна, чна винидихъ лагьайвал, Кьасумхуьруьн 3-нумрадин аялрин бахчадин заведующий я.
— Чи аялрин бахчада 7 тербиячиди, 4 педагогди, вири санлай 27 касди кIвалахзава, — лугьузва Раиса Аминовади. — Виридахъ чпин рекьерай кьилин ва пешекарвилин махсус юкьван образование ава. Аялрал пешекаррин рикI гзаф ала, абур чпин везифайрив жавабдарвал гьисс авуналди эгечIзава.
Малум хьайивал, бахчадин пешекарри бицIекрихъ галаз школадилай виликан чирвилер гунин, абурун зигьин хци авунин ва маса рекьерай гьар жуьредин мярекатар тухузва.
Раиса Аминовади лагьайвал, бахчада 96 аялдиз тербия, сифтегьан чирвилер гузва. Амма коронавирусдин тIугъвалдихъ галаз алакъалу яз эцигнавай сергьятвилериз килигна, алай вахтунда бахчада 35 аял ава. Абурун сагъламвал медсестради гьар юкъуз ахтармишзава.
— Алай вахтунда чна кьилин фикир аялриз чими тIуьнар гуниз, хуьрекар менфятлубур хьуниз гузва, — давамарзава ихтилат Раиса Надировнади. — Чна 10 йикъан меню гьазурзава. И жигьетдай чна аялрин яшар, гьазурзавай хуьрекрин, бицIекриз гузвай мижейрин, емишрин менфятлувал фикирда кьазва. Пищеблок герек вири шейэралди таъмин я. Санитариядин истемишунрални чна кIевелай амал ийизва.
Чун аялри чими тIуьнар незвай, абур ксузвай, аялрихъ галаз тербиячийри ва маса пешекарри гьар жуьредин мярекатар, къугъунар тухузвай кIвалеризни фена. Анра хъсан къайда, михьивал, экуьвал ава. БицIекрин гуьгьуьларни чаз шад яз акуна. Вири и крари Раиса Аминова кьиле аваз аялрин бахчадин пешекарри бицIекрин гьакъиндай кьетIен къайгъударвал ийизвайди къалурзава.
Хазран Кьасумов
