10-октябрдиз Махачкъаладин 61-нумрадин юкьван мектебдани лезги диктант кхьена. Диктант кхьизвайдакай виликамаз аялриз, абурун диде-бубайриз, мектебда кIвалахзавай лезги муаллимриз хабар ганвай.
И югъ шегьерда экуьнилай гатIунна къати гарар авайди хьана. Гьатта тарарин хилер хана, гзаф мертебайрин кIвалерин цларикай сувагъ хкатна машинрин винел аватай дуьшуьшарни хьана. Яргъи югъди мектебда ва патарив гвай магьлейра экверни авачир. И кIвалахар себеб яз диктант кхьинин карда вири 26 касди иштиракна. Амма лезги руьгь квай, хайи чIалаз гьуьрметзавай ксарин ишигъди мектебдин ктабханадин гегьенш зал экуь авунвай. Абурун арада тек муаллимарни аялар ваъ, атанвай мугьманарни авай. Кьилди къачуртIа, Махачкъала шегьердин администрациядай, 6752-войсковой частунай атанвай лезги кьегьалри вирибуруз къагьриманвилин чешне къалурна лагьайтIа жеда.
Диктант кIелдай муаллимдин везифа и сеферда мектебдин кIелунинни тербиядин рекьяй директордин заместитель, лезгийрин сейли шаир ва литературадин критик, филологиядин илимрин кандидат Халидин Эльдарова кьиле тухвана. И кардини мярекат тешкилунив эгечIнавай дережадин кьакьанвал успатзавай. Виридаз аквадай чкайрал эцигнавай лезги ктабри, журналри, плакатри диктант кхьизвайбурун гьевес мадни хкажнавай. Гьевесдивди, саки сувар хьиз кьиле фейи мярекат, «Лезги диктант — 2020» акция тешкилнавай комитетди фикирдиз къачунвай макьсадриз жаваб гудайди хьана.
Чка-чкада, дуьньядин лезгияр авай гьар са маканда, йис-сандавай и серенжемда мадни гзаф ксари иштиракдайдал са шакни алач.
«Лезги газет»
