30-сентябрдиз Сулейман-Стальский райондин Алкьвадар Гьасан эфендидин тIварунихъ галай центральный библиотекадин кIелдайбурун залда машгьур журналист, “Лезги газетдин” сиясатдин отделдин редактор Нариман Ибрагьимова чи баркаллу районэгьли, отставкада авай полковник Магьмудов Масуб Мавлудовичан 70 йис тамам хьунихъ галаз алакъалу яз адан уьмуьрдин рекьиз талукьарна кхьенвай “Инсанвилин, гьахълувилин, дуствилин женгера” кьил алаз акъуднавай цIийи ктабдин презентация кьиле фена. Ктаб и мукьвара “Мавел” ООО-дин издательствода чапдай акъуднава.
Ктабдин рангунин сифте чинал военный форма алай полковникдин шикил ала. 100 экземплярдин тираж аваз 246 чиникай ибарат яз акъуднавай и ктабда адан игитдин уьмуьрдин рекьикай фикир желбдай делилар, багърийрин ва ярар-дустарин гзаф кьадар шикиларни гьатнава. Ам кIелиз регьят ва маракьлу я.
Ктабдикай ва адан игитдикай куьруь гаф рахуналди, мярекат журналист ва шаир Абидин Камилова ачухна ва ам полковникди муаллим яз Хив районда кIвалахдайла ада тарс гайи ученик, гзаф йисара Хив райондин образованидин управленидин начальник яз кIвалахай Хачмаз Меликовахъ галаз санал кьиле тухвана.
Анал ктабдикай чпин фикирар ва юбилярдин тIварцIиз хуш келимаяр гваз ЦIийи Макьарилай тир муаллим ТIажибов Мирзефер, и хуьруьн библиотекадин заведующий Ибрагьимова Милейсат, пенсионер Гьажибегов Сефибег, райондин образованидин управленидин начальникдин заместитель Аминов Къачабег, Алкьвадар Гьасан эфендидин музейдин директор, писатель Гьуьсейнов Гьуьсейн, дустарин патай Алисултанов Надир, гьакIни Хив райондин ЦIийи ЗахитIрин школадин директор Къарабегов Руслан, АрхитIрин СОШ-дин директор Эмирагъаев Эмирагъа, ЦIинитIрин СОШ-дин лезги чIалан муаллим Шагьмарданов Сейфулагь, райондин библиотекадин къуллугъчийрин тIварунихъайни Меликова Гуля рахана.
Эхирдай гаф юбилярдиз гана. Ада вичин гьуьрметдай алай четин вахтунизни килиг тавуна и мярекатдиз атунай, ктабдин жигьетдай ва гьакIни вичин тIварцIиз хуш келимаяр лугьунай, алхишрай чухсагъул лагьана. Ада гьакI аваррин Ботлих райондин векилрихъ галаз хванахвавилин, дуствилин алакъаяр тухунин карда куьмекар гунай, иштираквал авунай муниципальный райондин кьил Нариман Абдулмуталибовазни чухсагъул лагьана.
Мярекат тIугъвалдихъ галаз алакъалу яз, Роспотребнадзордин истемишунрал амал авунин шартIара кьиле фена.
Куьре Абид
