2019-йисалай инихъ 10-октябрь Лезги чIалан югъ яз къейдзава. Сифте яз ихьтин сувар арадал гъунин теклиф СтIал Сулейманан тIварунихъ галай райондин администрацияди ганай. 2019-йисан 17-июндиз и райондин депутатрин Собранидин 153-нумрадин къарардалди, 10-октябрь Лезги чIалан югъ яз малумарна.

Шад жедай кар ам я хьи, алатай йисан 10-октябрдиз лезги халкьдин тарихда сифте яз хайи чIалал международный дережада аваз диктант кьиле фена. Ана дуьньядин 5 уьлкведа авай лезгийри иштиракна. Мярекат ихьтин дережада аваз кьиле тухунин теклиф гайиди «ЛЕКИ» фондунин крар идара ийидай директор Фарман Шайдабегов тир.

И хъсан адет цIини давам жезва. Къе, Лезги чIалан юкъуз – 10-октябрдиз – онлайн-къайдада лезги чIалал диктант кьиле фида. Мярекатда иштиракиз кIанзавай гьар са кас Лезги диктантдин сайтда (ссылка https://lezgidiktant.ru/ )регистрация хьун шартI я.

Играми лезгияр! «Лезги газетдин» редакциядин коллективди квез Лезги чIалан югъ рикIин сидкьидай мубаракзава! Сагърай чи халкь, сагърай чи чIал. Лезги чIал амай кьван лезги халкьни амукьда!!!

«Лезги газет»