Алибег Фатахован — 110 йис

24-сентябрдиз  Цмуррин школадин актовый залда Дагъустандин советрин литературадин бине кутурбурукай сад тир писатель ва таржумачи  Алибег  Фатахован  110 йис тамам хьуниз талукьарнавай чIехи мярекат кьиле фена. Ам Сулейман-Стальский райондин адми­ни­стра­ция­дин образованидин управленидин  пешекаррин иштираквал аваз, и мектебдин лезги чIалан­ни литературадин тарсар гузвай му­ал­лиммри ва кIелзавай аялри санал тешкилнавайди тир. Мярекатда яратмишдай ин­теллиген­ция­дин, СМИ-дин векилри, муаллимри, шаирдин невейри иштиракна.

Актовый залда махсус доскадилай чIехи шаирдин гуьзел къамат аквазвай. Анаг “Алибег Фатахован -110 йис”, “Цмур — Куьредин абур” ва маса гафар кхьенвай лозунгри безетмишнавай, шаирдин ктабрин выставка гьазурнавай.

Мярекат школада кIелзавай аял­ри “Райондин гимн” тамамарунилай башламиш хьана. Ам школа­дин лезги чIаланни литературадин тарсар гузвай муаллимар тир Гьажибегова Дуьлберани Мегьамедов Сефербега кьиле тухвана.

Анал лезгийрин шииратдин туьхуьн тийир экуь гъед тир Алибег Фа­та­хован уьмуьрдикай, бажарагъдикай, яратмишунрикай чпин фикирар ва теклифар гваз и школадин дирек­тор Абдулнасир Ханвердиев, РУО-дин начальникдин заместитель Къа­чабег Аминов, шаирар тир Сажидин Саидгьасанов, Абидин Ка­милов, чIехи шаирдин птул, хуьруьн ад­министрациядин кьил Раида Али­бе­гова ва маса юлдашар ра­хана.

Анал 9-классдин ученица ­Амина Темирхановади шаирдин уьмуьр­­дикай ва яратмишунрикай фи­кир желбдай суьгьбет авуна. Школадин аялри шаирдин “КьатI-кьатI авур зунжурар”, “Зарбачи Гьасан”, “МТС” ва маса эсеррай кIусар хуралай кIелна.

Мярекат школадин аялрин хорди тамамарай шаир Фейзудин На­гъиеван “Сагъ я лезги халкь” манидалди акьалтIарна.

Мярекатда иштиракай мугьманри хуьруьн администрациядин кьилин ва школадин руководстводин вилик виликан хуьруьн школадал алаз хьайи Алибег Фатахован тIвар цIийи школадиз хгунин, Махачкъалада мусурман сурара кучукнавай адан сур жагъур хъувунин, гьакIни адан хайи невейрин суракьда хьунин ва са жерге маса месэлаяр райондин ва гьакIни вине авай талукь къуллугърин руководителрин вилик эцигунин теклифар гана.

Куьре Абид