Алатай йисан 14-октябрдилай Дагъустан рекъемрин телевиденидал элячIна. Къведай вацра тамам са йис жезва. Агьалияр патал рекъемрин телевиденидихъ авай къулайвилерикай гьам газетра кхьизвай, гьамни телевиденидай къалурзавай. Халкь вахтунда ва тамамдиз хабардар авун патал и важиблу кардиз талукь малуматар мукьвал-мукьвал тикрарзавай.

Гьелбетда, инсанарни и кардив жавабдарвилелди эгечIна. Гьакъикъатдани, рекъемрин телевиденидихъ хъсан терефар  авачиз туш. Абурукай сад — пулсуздаказ 20 каналдиз килигдай мумкинвал хьун я.

14-октябрь алукьна. Рекъемрин телевидение кардик акатна. Шад хьана жемятдиз. 20 каналдай чпиз кIани передачайриз, кинойриз, концертриз… килигдай мумкинвал ава. Амма и кар геждалди давам хьанач. Алай йисан июл­дин юкьварилай каналрин са пай квахьна. Маса районра, хуьрера и жигьетдай гьихьтин гьалар аватIа, заз хабар туш. Зи кIвале июлдин юкьварилай къенин йикъалди рекъемрин телевиденидин анжах 10 канал кардик кума. Гьар сеферда телевизор кутурла, “Нет сигнала” гафар акъатзава. Ре­къемрин телеви­денидикай менфят къачун патал герек вири та­­даракар —  приставка, антенна, маса шейэр — ви­ликанбур я, са затIни дегишнавач, я чеб чIур­ни хьанвач. За каналар квахьунин месэладин патахъай маса ксаривай хабар кьуна. Абуру чеб телевиденидиз “тарелкайрин” куьмек­далди килигзава лагьана. Са гафуналди, ре­къем­рин телевиденидикай менфят къачузвач.

Яраб каналар гьиниз квахьнатIа? И кардикай­ талукь компанийри агьалийриз хабар гун ла­зим­ тушни? ЧIур хьанвай чка аватIа, туьх­кIуьр­­­­на­ кIанда. Техникадихъ галаз алакъалу ме­сэлаяр я. Мумкин я са вуч ятIани кардикай хкатун.

Квахьнавай каналрин арада зи рикI алай “Звезда” канални ава. Белки, заз хьиз, и канал хейлин масабурузни хуш я жеди. ГьикI лагьайтIа, и каналдай асул гьисабдай уьлкведин яракьлу къуватриз талукь передачаяр къалурзава, цIийи хабарар гузва.

Мукьвал тир девирда рекъемрин телевиденидин квахьнавай каналар кардик ахкатдайдак умудар кутазва.

Райсудин  Набиев

_______________________________________________________________________________________________________________

Редакциядин патай

Чи штатдик квачир мухбир Райсудин Набиева вичин макъалада къарагъарнавай месэладиз талукь делилар чирун патал чун Урусатдин телевиденидин ва радиовещанидин сетдин (РТРС) Дагъустанда авай филиалдин директордин заместитель Альфред Акимович Акимовахъ галаз алакъалу хьана. Ада чаз хабар гайивал, къенин юкъуз,  виринра хьиз, республикадин кьиблепатан районрани рекъемрин телевиденидин вири каналар кардик ква. Адан гафаралди, эгер бязи каналар кардикай хкатнавайтIа, арза-ферзе ийизвайбурун кьадар гзаф жедай.

Гьуьрметлу Райсудин муаллим! РТРС-дин Дагъустанда авай филиалдин векилри гьисабзавайвал, куь кIвале рекъемрин телевиденидин 20 каналдикай 10 квахьунин себеб куь кIвале авай техникадихъ галаз алакъалу хьун мумкин я. Рекъемрин телевидениди са манийвални авачиз кIвалахзава. Куь месэладин патахъай ахтармишунар тухун ва квахьнавай 10 канал кардик кухтун патал мукьвара куь кIвализ РТРС-дин республикада авай филиалдин пешекарар къведа.

«Лезги газет»