Чаз гзаф кIани “Лезги газетдин” редакция! Зун са кьадар яшар хьанвай агъсакъал я. Жуван уьмуьрда заз дуьньядин уькIуь-цуру пара акуна. Зун гьамиша Сулейман-Стальский райондин Эминхуьре яшамиш жезва. Гьавиляй заз жуьреба-жуьре йисара хайи хуьре кьиле фейи вакъиайрикай, регьбервал гайи кавхайрикай, абуру халкь паталди авур кIвалахрикай, маса месэлайрикай хабар ава.
Заз алай вахтунда хуьруьн администрациядин кьиле акъвазнавай жегьил пешекар, халис ватанперес Сабир Гьасанбегович Юзбегова хуьр аваданлу авун патал кьабулзавай серенжемрикай куьрелди лугьуз кIанзава.
Жегьил ятIани, алакьзавай кIва-лахар акурла, хуьруьн жемят гьейран жезва. Гьакьван рикI гваз эгечIзава ам жемятдин къайгъуйрив.
Хуьруьн кьилин везифаяр тамамарзавай са куьруь девирда Сабир Юзбегова цIуд йисаралди гьялиз тежез амукьай месэлаяр, дердияр кьилиз акъудзава. Мисал яз, Эминхуьре хъвадай цин кьитвал авай. Гила лагьайтIа, хуьруьн вири куьчейриз яд агакьнава. Лекъвер-тунар авай рекьер, чиргъ вегьез, къайдадиз гъизва. Са шумуд трансформаторни дегишарна, экв авачир пипIериз электричестводин симер тухузва. Са гафуналди, Эминхуьруьн кавха датIана кIвалахдин яцIа ава. Гьавиляй жемятни адалай рази я.
P.S. Сулейман-Стальский райондин администрациядин сайтда авай делилралди, Сабир Юзбегова Эминхуьруьн администрациядин кьилин везифаяр алай йисан мартдин вацралай тамамарзава. Ам 1975-йисан 7-сентябрдиз дидедиз хьана. Эминхуьруьн юкьван мектеб акьалтIарайдалай кьулухъ технический рекьяй пешекарвал къачуна. Хизанда пуд велед чIехи жезва. Хуьр аваданламишунин важиблу карда къуй адахъ мадни агалкьунар хьурай!
Къафлан Османов,
Эминхуьр
