Эхиримжи вахтара мергьяматлувал, меценатвал эдеблу къилихдиз, хъсан адетдиз элкъвенва. Им гьар садак гьевес кутадай делил я. Ихьтин лайихлу чешнеяр чаз лезги чилин ватанэгьлийри мукьвал-мукьвал къалурзава. Мисал яз, эхиримжи йисара Сулейман-Стальский районда мергьяматлувилин мураддалди ватанэгьлийри, санлай къачурла, 800 миллион манатдив агакьна чпин хсуси пулдин такьатар чара авуна.
Ватандин абадвални мублагьвал, адан экуь гележег фикирда авай ксари жумартвал къалурунин нетижада райондин турпагъра яшайишдиз талукь цIийи-цIийи объектар кардик акатнава ва и гьерекатар давамни жезва. Ибурулайни гъейри, дарвиле авайбурун гъил кьунин, кар алай идарайриз герек тир тадаракар пишкешунин серенжемарни тIимил тешкилзавач.
Ихьтин регьимлувал къалурунин карда вичин ери-бине Вини СтIалдилай тир, Москвада яшамиш жезвай Пирмегьамед Балакеримовни къерехда акъвазнавач. Сулейман-Стальский райондин пресс-къуллугъди къейд авурвал, 2019-йисуз П. Балакеримова хайи хуьре памятникни галай женгерин баркаллувилиз талукь обелиск эцигуник кьил кутунай. Ам эцигунин, адахъ ва аялрин бахчадихъ галай мулкар аваданламишунин кIвалахриз мергьяматлу ватанэгьлиди гзаф такьатар серфна. Адан куьмекдалди хайи хуьруьн аялрин бахчани цIийи хъувуна.
И мукьвара Пирмегьамед Балакеримова Вини СтIалрин юкьван мектеб патал 10 моноблок ва ученикар патал суьреяр (аялрин яшдиз, буйдиз килигна кIани жуьреда къайдадик кутаз жедай столар, стулар) ва интерактивный доскаяр маса къачуна.
Ихьтин ксариз гьам хуьруьнвийри, гьам райондин вилик-кьилик квайбуруни алхишзава.
«Лезги газет»
