Дагъустандин Пенсийрин фондунай хабар гайивал, пенсиядиз 57 йис тамам хьайила экъечIдай ихтияр авай категориядик гзаф аялар авай дидеяр акатзава…
“Алай вахтунда пенсийриз талукь яз кардик квай законодательстводал асаслу яз, вахтунилай вилик пенсиядиз экъечIдай ихтияр агьалийрин кьилдин категорийриз ава. Гьа гьисабдай яз 2019-йисан январдилай пенсийриз талукь законодательстводи тайинарнавай яшариз килигна гузвай страховой пенсия вахтунилай вилик, яни 57 йис тамам хьайила, къачудай ихтияр пуд аял ханвай ва абуруз 8 йисалди тербия ганвай дишегьлийриз ава”, — хабар гузва ПФР-дай.
Амма анай мадни алава хъувурвал, вахтунилай вилик пенсиядиз экъечIун патал важиблу кьве шартI ава: “57 йис тамам хьайила, пенсиядиз экъечIун патал 15 йисалай тIимил тушиз страховой стаж ва 30-далай тIимил тушиз кьилди са касдинди тир (индивидуальный) пенсиядин коэффициент (ИПК) хьун лазим я”.
* * *
Малум хьайивал, яратмишунрал машгъул дагъустанвийризни яшлувилиз килигна гузвай пенсиядиз фад экъечIдай ихтияр ава.
Амма мадни дуьздаказ лагьайтIа, и категориядик сегьнедал яратмишунрин кеспидик квай ксар акатзава. Вири дуьшуьшра, винидихъни къейднавайвал (законодательстводи тIалабзавайвал), важиблубур ва кьилинбур тир кьве шартI ава. ИкI, и пенсия къачун патал а ксарихъ (яратмишунрин кIвалахдиз килигна) 15-30 йисан стаж хьун герек я. Идалайни гъейри, пенсиядиз фад экъечIзавай касдихъ пенсиядин коэффициент, 2020-йисуз адан кьадар 18,6 баллдилай тIимил тушиз, хьана кIанзава. Гьар йисуз лагьайтIа, ИПК-дин кьадар 2,4 баллдин (гьа икI 30-дал къведалди) артух жезва.
«Лезги газет»
