И йикъара республикадин 5 райондин азарханайрив санай масаниз тухудай (КамАЗ автомашинрин бинедаллаз кардик кутунвай) фельдшервилинни акушервилин пунктар (ФАП) агакьнава. Абур чкайрал агакьарунин кIвалах региондин “Сифтегьан хилен медико-санитарный куьмек вилик тухун” проектдин сергьятра аваз кьилиз акъудзава. Идакай “Лезги газетдиз” РД-дин здравоохраненидин министерстводай хабар гана.

Дагъустандин здравоохраненидин министр Жамалудин Гьажиибрагьимован гафаралди, цIийи машинар тIимил инсанар яшамиш жезвай хуьрерин агьалийриз куьмек гун патал ишлемишда. Абур — чархарал алай гъвечIи поликлиникаяр — ФАП-ар авачир чкайриз фида.
— Санай масаниз тухуз жезвай и комплексри райцентрайривай яргъа яшамиш жезвай агьалийрин сагъламвал ахтармишунин, пешекарри, чкайрал¬ фена, диспансеризация, вакцинация кьиле тухунин крара куьмекда, — къейдна¬ ада.
Йисан эхирдалди Дагъустандиз 54 комплекс агакьун лазим я. Абурукай¬ 4 — мобильный амбулатория, 32 — ФАП, 12 — флюорограф ва 6 маммограф я.

«Лезги газет»