Инсан патал хаталу гьайванрин жуьреяр гьуьле 3 агъзурдалайни гзаф аваз гьисабзава. Абур пуд кIватIалдиз пайнава: гьайванар-вагьшияр, зегьерлу гьайванар ва чеб тIуьниз ишлемишайтIа, инсан зегьерламиш жедай гьайванар.
Вагьшибурук наха (акула), барракуда, мурена ва косатка акатзава. Тек нахаяр фикирда кьуртIа, лацу рангунин лап чIехи нахадал инсанар недайдан (людоед) тIвар акьалтнава. Инсанри кьурбурукай виридалайни еке нахадин яргъивилел 11 метр алай. Гзафни-гзаф Кьиблепатан Африкадин ва Австралиядин цера яшамиш жезвай нахаяр хаталу яз гьисабзава.
Эгер зегьер алай гьайвандик хатадай хуькуьрайтIа, инсан патал ам хаталу я. Ихьтинбурук скат-хвостокол, балугъ-къван, балугъ-къиб, балугъ-зебра, гьуьлуьн кьуьгъуьр, конус ва гьуьлуьн гъуьлягъар акатзава.
Пуд лагьай кIватIалдик чеб тIуьниз ишлемишайтIа, инсан зегьерламиш хьун мумкин тир бязи балугъар акатзава.
«Лезги газет»
