Чи ватанэгьлияр — гьар сана
Вилик тайин макьсад эцигна, рикIиз хуш кардив жавабдарвилелди, гьевесдивди эгечIзавай ксари хъсан нетижаярни арадал гъида. Алай вахтунда Брянск шегьерда яшамиш жезвай ва ана областдин чемпионатда футбол къугъвазвай Мегьамед Ханларович Алишевни къастунал кIевивалзавай чи ватанэгьли, машгьур футболист, хайи районда футбол вилик тухун патал вири жуьредин алахъунарзавай ватанэгьли я. Ам РФ-дин Росгвардиядин футболдин хкянавай командадикни ква.
Исятда ам хайи райондин “Ахцагь” командадин президент я, ада гьам гьевесламишунин, гьам тешкиллувилин жигьетдай багъри командадиз еке куьмекар гузва.
Мегьамед 1991-йисуз Ахцегь райондин Къурукаларин хуьре дидедиз хьана. 9-классда кIелзавай чIавалай ам, Ахцегьрин хкянавай командадик кваз, футбол къугъваз эгечIна. И девирда ам Кьиблепатан Дагъустанда лап хъсан гьужумчи яз машгьур хьана.
Мектеб куьтягьайдалай кьулухъ ам ДГПУ-дин физкультурадин факультетдик экечIна. Футбол уьмуьрдин метлебдиз элкъвенвай жегьил алатай йисара са кьадар вахтунда “Анжи-3”, ахпа “Дагдизель” командайрик кваз къугъвана.
Алай йисуз ада вичин вилик “Ахцагь” команда Дагъустандин футболдин кьилин лигадиз хкунин макьсад эцигнава. Августдин вацра республикадин кьилин лигада сад лагьай къугъунни кьилиз акъудна. Дагъустандин чемпионатда эхиримжи 5 йисуз иштиракнавай командади, Мегьамед Алишеван алахъунар себеб яз, цIийи кьилелай нефес къахчузва. ИкI, алай вахтунда ахцегьвийрин команда чемпионатда Хасавюртдин командадихъ галаз 3-чкадал ала.
Къугъунра чпин хъсан вердишвилер къалурай цIийи иштиракчийрин жергеда Агъамет Гьажиев, Арсен Мустафаев ва Анвар Агьмедов ава. Анвара гьатта чемпионатда Дербентдин командадин варариз сад лагьай голни яна.
Мегьамеда чкадин цIийи футболистар желбунин кардиз кьилин фикир гузва. Ада тестикьарзавайвал, ватанда бажарагълубур гьамиша хьайиди я. ЦIийиз арадал хканвай хкянавай командадиз тренер Камил Гьажиева регьбервал гузва (адаз Гьажимурад Парпачевани куьмекзава). Иштиракзавай цIийи футболистрин алакьунар рази жедайбур я.
“Исятда чемпионатда “Ахцагь” 5-чкадал ала. Турнирдин премьер-лигадик экечIун патал са тIимил кьван викIегьвал бес хьанач. ЯтIани, цIийиз кардив эхгечIнавай жегьилрин алакьунар гьевес кутадайбур хьанва”, — ихтилатзава Мегьамеда.
Мегьамед Алишева, Махачкъаладиз хтана, “Маидат” ресторанда командадихъ галаз шад мярекатни кьиле тухвана, турнирдин нетижаяр кьуна, вилик цIийи макьсадар эцигна, тафаватлу хьайи спортсменриз шабагьарни гана. Кьилди къачуртIа, шабагьар гайибурун жергеда къугъунра лап хъсан алакьунар къалурай Арсен Асланбегов, лап хъсан бомбардир Замир Ягъибегов, командадин лап хъсан цIийи футболист Ягъибег Тагъибегов ава.
Сир туш, футбол спортдин гзаф такьатар серф авун истемишзавай жуьре я. Футболдин “Ахцагь” клубдиз Мегьамед Алишева вичин хъсан дустарин куьмекдалди къаюмвалзава.
“Командадиз чи машгьур ватанэгьли Мамед Абасовани итиж ийизва, ам гагь-гагь къугъунриз килигун патал хквенни ийизва. Ахцегь райондай тир Жигерхан Сулейманова тренажеррин зал командадин ихтиярда тунва. Райондин ОВД-дини, ЦРБ-дини командадиз куьмекар гузва, адан тереф хуьзва. Ихьтин месэлайра райондин администрациядини чпин пай кутазва”, — лугьузва М. Алишева.
Мегьамед Алишева къейдзавайвал, ватандивай яргъа аватIани, ам “Ахцагь” командадин кьилин тренер Камил Гьажиевахъ галаз датIана алакъада ава.
Къведай йисуз “Ахцагь” стадиондин бинедаллаз футболдин школа арадал гъидайвал я. Футболистри парталар дегишардай чкаяр ремонт хъийида, 500-600 касдивай ацукьна килигиз жедай хьтин чкаяр туькIуьрда. Гележегда абуруз махсус школа республикадин виридалайни къуватлудаз элкъуьриз кIанзава. Школада гъвечIибурукай, жегьилрикай ибарат жуьреба-жуьре командаяр арадал гъидайвал я. ГъвечIи футболистар патал ихьтин мумкинвилер арадал гъунихъ еке метлеб ава: абурукай гележегда футболдин машгьур гъетер хкатда. Тренерди къунши хуьрерай малум хьайи бажарагълу жегьиларни командадиз желб авуниз фикир гун кьетIнава.
Футболдал гзаф рикI алай, акьалтзавай футболистрин-ватанэгьлийрин гьакъиндай рикIин сидкьидай къайгъударвалзавай, абуруз мумкинвилер гунин макьсадар вилик эцигнавай викIегь Мегьамедан мурадар къуй вири кьилиз акъатрай!
К.Ферзалиев
