Ахцегьрин 2-нумрадин ДЮСШ- дин боксдин секциядиз (тренер Нариман Ильясов) аялар ашкъидалди къвезва. Н.Ильясован гъилик боксдай вердишвилер къачузвай аялри райондин ва республикадин дережадин акъажунра сад лагьай чкаяр кьазва. Мугьаммад Гьамзаев адан лап хъсан ученикрикай сад я.

Ам 5 йис хьайидалай инихъ боксдал машгъул жезва. Секциядиз атай гьа сифте йикъалай Мугьаммад вичин устадвал ва техника хкажун патал рикIивай алахъиз хьана. Гьавиляй адахъ гьа сифте йисалай башламишна агалкьунарни жезвай. ИкI, бизнесмен Н.Газалиеван приз патал боксдай Кьиблепатан Дагъустандин кIвенкIвечивилин, спортдин мастер Д.А.Арамян рикIел хкунин турнирра вичин заланвилин категориядай 1-чкаяр кьуна. 2013-йисуз Вирироссиядин кIвен-кIвечивилин турнирда ам кьвед лагьай чкадиз лайихлу хьана. Вичихъ гележег авай боксер а чIавуз РД-дин жаванрин хкянавай командадик кутунай. Гьелбетда, ихьтин дережадив агакьун регьят кар туш. И агалкьунрик, шаксуз, адан сифте тренер хьайи Н.Ильясован зегьметдин еке пайни ква. Акъажунра тафаватлу хьунай М.Гьамзаеваз хейлин гьуьрметдин грамотаяр, медалар ганва. Алай вахтунда М.Гьамзаев ДГТУ-дин транспортдин факультетдин 1-курсунин студент я. Ада ДГТУ-дин Бузай Ибрагьимован тIварунихъ галай ДЮСШ-да боксдин секцияда тренер Радик Велиеван гъилик вердишвилер къачун ва турнирра иштиракун давамарзава, вуздин общественный уьмуьрдикайни къерех жезвач.
Алатай йисан декабрдин вацра 2000-2001-йисара дидедиз хьанвай жегьилрин арада боксдай кьиле фейи Махачкъаладин турнирда ада 81килограммдин заланвилин категориядай сад лагьай чка кьуналди, шегьердин чемпионвилин тIвар къазанмишна. М.Гьамзаев гьакI боксдай кьиле тухвай дуьньядин, Вирироссиядин турниррин гъалибчи, РД-дин чемпион, кьуд сеферда РД-дин Кьиблепатан зонадин чемпион я.

Рагьидин Эминов