И йикъара Дагъустандин искусстводин хилен ва гьакI вири общественностдин векилривни чIехи магьрумвал агакьна.

Вичин гьеле 50 йисни тахьанмаз, яратмишунринни илимдин ахтармишунрин рекьера умудлу камар къачуз хьайи художник-скульптор, философиядин илимрин кандидат, РАН-дин ДНЦ-дин ИЯЛИ-дин илимдин къуллугъчи, тIвар-ван авай скульптор, РФ-дин халкьдин художник Гьейбат Нурагьмедович Гьейбатован хва Сабир Гьейбатович Гьейбатов денбеден залум ажалди чавай къакъудна.
С.Гь.Гьейбатов 1969-йисуз Махачкъалада дидедиз хьана, 39-нумрадин юкьван школа, Москвадин худшкола, ДГПУ-дин худграфический факультет акьалтIарна.
2007-йисуз философиядин илимрин кандидатвилин диссертация хвена.
2003-йисалай инихъ, илимдин къуллугъчи яз, винидихъ тIвар кьунвай институтда кIвалахзавай.
Художник-скульптор яз, ада вичин бубадихъ галаз санал хейлин ядигарар арадал гъана. Абурук алай вахтунда Лезгийрин госмуздрамтеатрдин вилик хкажнавай СтIал Сулейманан буйдин памятникни ква. Эхиримжи йикъара ада лезгийрин машгьур хва, карчи, РФ-дин Федеральный Собранида Дагъустандин патай сенатор Сулейман Керимован къамат скульптурада тунал кIвалахзавай. Гьайиф, залум ажалди адаз а мажал ганач.
Чна рагьметлудан хизандиз, диде-бубадиз, ярар-дустариз, вири мукьва-кьилийриз башсагълугъвал гузва. Адан экуь къамат чи рикIера гьамишалугъ яз амукьда.

«Лезги Газет»