Эхиримжи вахтара Кьиблепатан Америкадай Россиядин кьиблепатан республикадиз — Дагъустандиз кьуршахар кьунай пагьливанар гзаф къвез эгечIнава. Сифте колумбийвияр, гуьгъуьналлаз Бразилиядай, Перудай, Экводордай мугьманар ва гила Марадонадин ватанэгьлияр атана.
Кьиблепатан американвийриз Дагъустандин рехъ къалурайди яргъал йисара абурун континентдал кIвалахай Россиядин лайихлу тренер, чи ватанэгьли Эседуллагь Шагьмарданов я. Ина абур хъсандиз кьабулзава ва гьавиляй ашкъидивди Дагъларин уьлкведиз къвезва.
Аргентивияр ирид кас атана — кьуд гадани кьве спортсмен руш ва дестедин регьбер Даниель Родригес. Кьакьан, акунар алай Родригес вуздин муаллимдиз ухшар я, кьуршахар кьунихъ галаз алакъа авай касдиз, са артухан, ваъ. Амма малум хьайивал, ам Панамерикадин къугъунрин, гьакIни ветеранрин арада кьуд сеферда дуьньядин чемпионатрин призёр я. Алай вахтунда адан 59 йис я. Родригеса кьуршахар кьунай Аргентинадин Федерациядин секретарвиле кIвалахзава, гатфарихъ анин президент жез чалишмиш жеда. Буэнос-Айреседа жанаби Родригесахъ единоборствойрай вичин хсуси клуб ава. Хсусиятрихъ галаз алакъалу вичин бизнесдилай жезвай хийирдиз килигна ада клуб хуьзва.
— Аргентинада кьуршахар кьунал са акьван гзаф ксар машгъул жезвач. Спортдин и жуьредай вири уьлкведа 500 жаванди чпин алакьунар ахтармишзава, — суьгьбетна Родригеса. — Кьуршахар кьунин уьлкве тушир ана чун эхиримжибурун арада ава. Са гьикI ятIани гьалар къайдадик кухтун патал чун кьуршахар кьунай вилик квай уьлквейриз физва. Саналди тир тренировкаяр тешкилзава, чирзава ва чкадин спортсменривай тежриба къачузва. ИкI, алатай йисуз са вацра Ирандиз фена. И карди гзаф хийир гузва, пагьливанри чпини лугьузва, зани кьатIузва. Гила, за гьисабзавайвал, азаддиз кьуршахар кьунай дуьньяда виридалайни зурба школа тир Дагъустандиз атана. Иниз чи вири сад лагьай нумраяр атанва. Абурун арадай пуд сеферда Кьиблепатан Америкадин чемпион ва кьве сеферда Панамерикадин жегьилрин арада кIвенкIвечивилерин гъалибчи Августин Дестрибатсан, Риода Олимпиадада буьруьнждин медаль патал бягьсера иштиракай руш Патрисия Бермудес ва 2016-йисуз жегьилрин арада дуньядин кIвенкIвечивиле 5-чка къазанмишай Эвелин Сосадин тIварар кьаз жеда. Махачкъалада чун 40 юкъуз мугьманвиле жеда. Чун лап хъсандиз кьабулна. Сагърай, — къейдна Родригеса.
Аргентинвияр Гьамидован школадиз физва. Са юкъуз Олимпиададин центрадизни мугьман хьана. Ина Дагъустандин пагьливанар Ярыгинан турнирдиз гьазур жезвай. Аргентинвийвири машгьур пагьливанрихъ галаз шикилар ядай мумкинвални ахъайнач.
Тимур РАСУЛОВ
