Алатай гьафтедин эхирра Мегьарамдхуьруьн райондиз Дагъустандин Кьилин везифаяр вахтуналди тамамарзавай Владимир Васильеван тапшуругъдалди РФ-дин МЧС-дин РД-да авай Кьилин управленидин начальник-республикадин МЧС-дин министр Нариман Къазимегьамедов, адан заместителар Жарулагь Маллаев ва Руслан Мегьамедов мугьман хьана. Идакай “Лезги газетдиз” Мегьарамдхуьруьн райондин администрациядин пресс-къуллугъди хабар гана.

Райадминистрацияда кьиле фейи совещанидал бюджетдин хилен къуллугъчийриз вахт-вахтунда зегьметдин гьакъи гунин, и хи­лен къуллугъчияр банкдин платежрин “Мир” карточкадал элячIунин, Россиядин Президентдин сечкийриз гьазур хьунин ва маса ме­сэлаяр веревирдна.

Нариман Къазимегьамедова къейд авурвал, Владимир Васильеван тIалабуналди, бюджетдин хилен къуллугъчийриз зегьметдин гьакъи гун патал, Россиядин Президентдин ре­зерв тир фондунай республикадив 3,2 млрд. манат пул агакьна. Декабрдин мажибдин 40 процент декабрдин вацра, 60 процентни ЦIийи йисан суварилай кьулухъ гун лазим тир.

Министрди гьакIни уьлкведин Президентдин сечкийриз талукь месэлани кудна. “Россиядин Президентдин сечкияр чи уьлкведин уьмуьрда  кьиле физвай лишанлу вакъиа я”, — лагьана Н.Къазимегьамедова.

Мегьарамдхуьруьн райондин кьил Фарид Агьмедова мугьманар тебрик авурдалай кьулухъ, районда Президентдин сечкийриз гиламаз гьазурвилер аквазвайди къейдна. “2012-йисуз кьиле фейи сечкийриз гьазур хьун вини дережада аваз тешкилунай Мегьарамдхуьруьн район кIвенкIвечи пуд райондин жергеда авай. Чна алай йисузни гьа ихьтин агалкьунар къазанмишдай къаст эцигнава”, — алава хъувуна Ф.Агьмедова.

«Лезги газет»