Республикадин образованидинни илимдин Министерстводи лап хъсан муаллимар — предметникар тайинарунин мураддалди пешекарвилин конкурсар тухунин гьакъиндай малумарнава. Муаллимрин, предметникрин яратмишунардай акъажунар алай йисан 27-февралдилай 25-апрелдалди образование вилик тухунин Дагъустандин институтдин базадал кьиле фида. Сад лагьай конкурс 27-28-февралдиз жеда. Анал урус чIалайни литературадай Дагъустандин лап хъсан муаллим гьим ятIа хкяда.
ЦIи географиядай, математикадай, къецепатан чIаларай, химиядай, информатикадай, биологиядай, тарихдай ва обществоведенидай, физикадай, технологиядай, физкультурадай, ОБЖ-дай лап хъсан муаллимар тайинарда.
Конкурсра иштирак авун патал арза, гьакIни иштиракчидин информационный карта образованидин муниципальный управленидиз ракъурна кIанда.
Конкурсантриз предмет, методикадин ва алай аямдин техникадин такьатар ва электронный ресурсар ишлемишиз чир хьунай алакьунриз къимет гуда.
Министерстводин умуми образование вилик тухунин управленидин руководитель Лариса Абрамовадин гафаралди, Дагъустандин муаллимри гьар йисуз Вирироссиядин “Йисан муаллим” конкурсда иштиракзава. “Конкурсдин финалдиз субъектдай анжах са педагог акъатзава. ТIимил бажарагълу тушир гзаф кьадар муаллимар къерехда амукьзава”, — лагьана ада.
«Лезги газет»
