2001-йисуз Къазан шегьерда Татарстан Республикада яшамиш жезвай дагъустанвийрин “Дагъустан” тIвар алай тешкилат арадал гъана. Алай вахтунда и тешкилатдин жергейра лезгийрин, яхулрин, табасаранрин, аваррин, даргийрин, къумукьрин, Дагъларин уьлкведин маса миллетрин векилар ава. 2008-йисалай инихъ Къазандин “Дагъустан”-диз чи ватанэгьли Арсен Мирзебегович Балафендиева регьбервал гузва.
Арсен Балафендиеван ери-бине Сулейман-Стальский райондай я. Муаллимрин хизанда чIехи хьайи гададиз Къазандин госуниверситетдик (КГУ) экечIиз кIан хьана. Къейд ийин хьи, и шегьерда адан халу, машгьур хирург СултIан-Агьмед МутIалибовни (адакай макъала газетдин къведай нумрадай кIелиз жеда) яшамиш жезвай. Гьа икI, А.Балафендиева 1992-йисуз КГУ-дин юридический факультет акьалтIарна, 8 йисуз адвокат яз кIвалахна. Исятда чи ватанэгьлиди КГУ-дин юридический факультетдин уголовный праводин кафедрада старший преподаватель яз зегьмет чIугвазва. 2016-йисуз ада агалкьунралди юридический илимрин кандидатвилин диссертацияни хвена.
Къейд ийин хьи, Арсен Балафендиев Татарстан Республикада сейли инсан я. Ам каратэ — кекусинкайдай Къазанда авай Федерациядин кьиле акъвазнава ва адан алахъунар себеб яз республикадин сергьятра аваз спортдин, тербиядин, ватанпересвилин тах квай хейлин мярекатар тешкилзава. Татарстан Республикадин общественный деятелрин Союздин Президиумдин член тир А.Балафендиева, юрист яз, РФ-дин Верховный Суддин кьве проектдиз талукь илимдин къарар кьабулуниз талукьарнавай серенжемрани иштиракна.
Лагьана кIанда, А.Балафендиева регьбервал гузвай “Дагъустан” тешкилат Татарстанда машгьур хьанва. Тешкилатди Ватандивай яргъа Дагъустандин халкьарин чIалар, меденият хуьн патал мярекатар, сейли дагъустанвийрихъ галаз гуьруьшар тешкилзава, лезгинкадал кьуьлериз чирдай кружок кардик кутунва, хайи чIалар чирдай гьяд йикъан мектеб ва “Дагъустан” тешкилатдин бинедаллаз Къазанда Дагъларин уьлкведин халкьарин милли кIватIалар арадал гъидай ниятарни ава.
Чазни чи кьегьал ватанэгьлидин рикIевай вири мурадар кьилиз акъатна кIанзава.
«Лезги Газет»
