2020-йисан 1-сентябрдилай уьлкведин, гьа жергедай яз Дагъустандин мектебрин уьмуьр­да са жерге дегишвилер тунва. Абурукай бязибур коронавирусдин тIугъвал­дихъ галаз алакъалубур я. Агъадихъ чна абурукай куьруь малуматар гузва.

Пулсуз чими хуьрекар

Дагъустандин мектебра сифтегьан классра кIелзавай аялриз йикъа са сеферда пулсуз чими хуьрекар гузва. Мектебрин хиве ая­лар хъсан еридин ва кфетлу хуьрекралди таъ­минарунин везифа тунва.

Къейдна кIанда, алай вахтунда республи­када саки 500-дав агакьна мектебра аялриз пулсуз чими хуьрекар гузва. Мукьвара Махачкъалада РД-дин Кьил Владимир Василь­е­ван гуьзчивилик кваз и месэладай тухвай совещанидал РФ-дин просвещенидин министрдин заместитель Екатерина Толстиковади­ хабар гайивал, мукьвал тир девирда мадни 150 мектебда и кIвалах кардик кутадайвал я. Аялриз гузвай хуьрекрик жими ва кIеви хуьре­кар, салатар, хъвадай чими затIар акатзава.

Са мектебда кIелда

Са хизандай тир аялриз виридаз са мектебда кIелдай ихтиярар ава. Ихьтин къанундал алатай йисан декабрдин вацра уьл-кве­дин­ Президент Владимир Путина къул чIу­гуна.

Классдиз регьбервал гунай

Чна виликдайни хабар гайивал, цIийи кIе­лунин йисалай (2020/2021) гатIунна, классдиз­ регьбервал гунай муаллимдиз вацра 5 агъзур манатдин кьадарда аваз алава пул гуда.

ТIугъвал себеб яз…

Актовый залриз, ктабханайриз, спортзалриз са-са класс кьилди ахъайда. Столовойдиз аялар виликамаз гьазурнавай графикдин бинедаллаз фида.

Идалайни гъейри, чирвилер гудай идарайриз гзаф кьадар инсанрин иштираквал авай мярекатар тешкил тавун теклифнава.

* * *

Мектебдин дараматдиз гьахьзавай гьар са касдин бедендин чимивал ахтармишда. Эгер тайин са касдал ифин алаз хьайитIа, ам мектебдин къенез ахъайдай ихтияр авач.

Эгер аялрикай садак коронавирус ака­тай­тIа, вири классдиз дистанционный къайдада тарсар гуда. Эгер тIегъуьн муаллимдик ака­тайтIа, ада тарсар гайи вири классра кIелза­вай аялар карантиндиз фида.

* * *

Мектебра кIвалахзавай муаллимри, кIелзавай аялри чарасуз яз маскаяр алукIу­нин жигьетдай къарар гьелелиг кьабулнавач. Амма пешекарри алукIун теклифзава. Чарасуз яз мектебрин столовойра кIвалахзавай ксари маскаяр алукIна кIанзава.

Маскаяр алукIунин жигьетдай къарар регионрин кьилевайбуру кьабулда. Мектебра лагьайтIа, гъилеривай гуьцIун патал антисептикар хьун лазим я ва классра мукьвал-мукьвал гьава дегишарна кIанда.

* * *

Гьелелиг мектебра тарсар адетдин къайдада кьиле физва. Амма коронавирусдихъ галаз алакъалу гьалар пайгардикай хкатиз хьайитIа, вахтуналди тарсар дистанционный къайдада тухун мумкин я. И жигьетдай къарар, регионда авай гьалар фикирда кьуна, чкадин гьукумдин кьилевайбуру кьабулда.

Къейд ийин хьи, дистанционный къайдада тарсар гун — им вахтуналди кьабулдай се­ренжем я.

Агьмед  Магьмудов