Эхиримжи йисара гузвай дидевилин капи­талди хейлин хизанриз чпин яшайишдин шар­тIар хъсанардай мумкинвилер ганва. Гьа са вахтунда сертификатдикай гьикI менфят къа­чузватIа, гзафбуруз чизвач. Мукьвал-мукьвал гузвай суалрик ихьтиндини акатзава: “Гьихьтин дуьшуьшра дидевилин капиталдин сертификатдикай тамамдиз (михьиз) хийир­ къачуз жеда?”. И суалдиз жаваб жагъу­­рун патал чун республикадин МФЦ-диз фена.

Идарадин пресс-къуллугъдин векилди хабар гайивал, анжах кIвалер маса къачудайла, сертификат тамамдиз ишлемишиз жезва. И кар кьилиз акъудун патал, сифте нубатда, маса гузвай къиметдин са пай сертификатдин гьисабдай гунал рази тир кIвалер маса гузвай кас (кархана) суракьна кIанда.

И месэла гьялунин карда МФЦ-ди куьмек гузва. Эвела дидевилин капиталдин такьатар ишлемишдай ихтиярар документралди тестикьарзава. Гуьгъуьнлай кIвалер маса къачузвайдаз ЕГРН-дай выписка (зеленка) къачун патал документар регистрационный па­ла­тадиз ракъурзава. Идалай кьулухъ тайин­ макьсаддихъ элкъуьрнавай пулдин такьа­тар (целевая выплата) эменни маса гузвайдан счетдиз ягъун патал, Пенсийрин фондуниз (ПФР) фена, арза кхьин герек я. Арза ах­тар­мишай­далай кьулухъ ПФР-ди пулдин та­кьа­тар кIвалерин виликан иесидин счетдиз язава, маса къачунвай кIвалерин цIийи сагьиб лагьайтIа, сертификатдин иесидикай жезва.

КIвалер маса къачун патал ихьтин шар­тIар ава:

—      аялар Урусатдин гражданинар хьун, вири­далайни гъвечIи аялдин яшар 3 йисалай тIи­мил тахьун (и истемишун ипотекадихъ галаз алакъалу савда ийидайла герек къвезвач);

—      маса къачузвай кIвал Урусатдин мул­карал хьун (эгер кьакьан мертебайрин кIва­лерай маса къачузватIа, а кIвалер аварийный гьалда тахьун);

—      кIвал михьиз къачун (са пай къачудай ихтияр авач);

—      хизанда авай вири ксариз маса къачунвай кIвалерикай пай (доля) хьун.

Кьилдин касдивай кIвалер маса къачузвай дуьшуьшда маса гунин-маса къачунин (купля-продажа) икьрар кутIунзава ва ана маса къачузвай касди гьикьван пул гъиляй-гъиляй ва гьикьванди  гуьгъуьнлай ПФР-дай рекье твадатIа къалурун шартI я.

Эцигзавай кьакьан мертебайрин кIвале­рай маса къачудайла, анаг эцигунрин кIва­лахрин 70 процент акьалтIарнавай чка хьун герек я. Застройщикдиз, кIвалер маса къачунин гьахъ-гьисабдайла, дидевилин капитал ишлемишзавайдакай хабар гана кIанда. Эгер ам рази хьайитIа, эцигунарзавай карханадинни маса къачузвай касдин арада икьрар кутIунзава.

Ипотекадикай менфят къачузвай дуь­шуьш­да дидевилин капитал сифтегьан взнос ийидайла ва бурж вахкудайла (са кьадар пул гана, са кьадар амай вахтунда), ишлемишиз жеда.

«Лезги газет»