ИкIни жеда кьван
Заз мадни, Фулфан вацIуз сел къведалди, Хъуьлуьда хьайи агьвалатдикай кхьиз кIанзава. ВацIуз сел къведалди (22-июлдиз пакаман сятдин 10-даз хьиз), булахдал яд гъиз фейи Якъубова Къизетер (абурун кIвалер вацIун мукьув гва) хкунал алай балкIанди булахдал ахъайнач.
БалкIанди нерай фуф ийиз, кьил галтадиз, кIвачери чил гатаз, пурх ягъиз, цел атайди булахдивай яргъаз къакъудзавай. Винидихъай фена, агъадихъай фена, балкIанди яд къачуз атанвай дишегьлидиз булахдал фидай мумкинвал ганач хьи, ганач…
— Я чан гьайван, ваз завай вуч кIанзава, бес зун цел фидачни? — лугьуз, Къизетер балкIандихъ галаз рахазвай.
Вич лугьумир кьван гьайванди инсан хаталувиликай, бедбахтвиликай хуьзвай. Са кьве декьикьани алатнач, вацIай тарар, кIарасар кьилел алаз атай сел акур Къизетера, балкIандин хак акъудна гадарна, вични катна, балкIандини вичин хурук кваз чукурна. Эгер балкIанди куьмек ганачиртIа, булахдал фейи дишегьли къутармиш хьунухь мумкин кар тушир.
Гьайванарни акьуллу жеда кьван!
С.Абдурашидов,
Хъуьлуьд
