Квез чидани?
ТIебиатдихъ гзаф сирер ава. Гьа ихьтинбурукай сад Австралиядин кеферпатан къерехрив гвай Мидл островдал алай Хиллиер тIвар алай вир я. Ам сифте яз XIX-асирда гьуьлуьн кицIерални китрал гъуьрч ийизвай гъуьрчехъанриз акуна. Бязи чешмейри къейдзавайвал, вир 1802-йисуз Британиядай тир сиягьатчи Мэть Флиндерсан экспедициядиз акуна.
Илимдин жигьетдай ахтармишунар тухуз лап мукьвал тир девирда гатIунна.
Вирин къерех тирвал къум ава ва эвкалиптдин тарар экъечIзава. XX асирдин эвел кьилера ина кьел хкудзавай, амма, бегьем къазанжияр арадал къвезвач лагьана, ругуд йис арадай фейила, и кар акъвазарна.
Вирин ранг дегиш жезвач. Гьатта вирин яд са банкадиз цайитIани, жегьре рангунинди яз амукьзава. Эвел кьиляй вирин ранг це авай кьелерихъ ва са жерге микроорганизмайрихъ галаз алакъалу авунвай. Анжах 1950-йисара кьиле тухвай ахтармишунри абурун арада са алакъани авачирди тестикьарна.
2016-йисуз тешкилай ахтармишунрин нетижада малум хьайивал, вирин цел жегьре ранг акьалтун ана авай “Дуналиелла солоноводная” набататдихъ ва са десте микроорганизмайрихъ галаз алакъалу тирди субутна.
Хиллиер яргъа тир островдал алайвиляй аниз гзаф кьадар туристар физвач. Асул гьисабдай вирел самолетра, вертолетра аваз лув гузва.
«Лезги газет»
