Яргъалди къвайи марфар себеб яз, 21 ва 22-июлдиз Рутул райондин Хъуьлуьдрин хуьруьн Фулфан вацIай пакамахъ та­рар, кIарасар кьилел алаз атай селди ва­цIун кьве пата авай багълар, салар, векьин уьруьшар вири барбатIна. ВацIун кьерел алай (машинар акъваздай чка) машинриз ва маса техникадиз гзаф хасаратвилер гана.

ВацIун кьве патани авай яшайишдин кIва­лериз еке зиянар хьана. Хуьруьн жемят, кавха Агъамирзоев Геннадий кьиле аваз, пуд йифизни пуд юкъуз­, секин­вал авачиз, вацIун къаравулда хьана. ВацIу гагь и пад, гагь а пад гатазвай, ам куьгьне­ хуьр галай патаз къвезвай. Жемятди, тарар­ атIуз, вацI а патаз элкъуьриз хьана. Хуьр ту­­худа лу­гьуз­, жемятдик къурхулувал акат­на. Ал­лагь­диз шукур, инсанриз хата хьанач. Хуьруьз къвезвай рехъни селди ацIур­на. Райондай ракъурай техникадин куьмекдалди са гьал (вад йи­къа­лай) рехъ ачухна.

Машинар къуза патан Цуругърин муькъвяй физвай. Ва­цIу гъанвай сел агъа муькъвелай виниз  хкаж хьана. Алай йисан сифте кьилера ремонт хъувур вини муьгъ, селди даяхар хкудна, уьцIена. Халкьди чпин  такьатралди пуд километр мензилдай гъанвай хъвадай цин турбаяр селди тухвана. (Сел къведалди, хуьруьн ви­ри кIвалера михьи, къайи яд авай).

Гила же­мят хъвадай цихъ муьгьтеж хьанва. Фулфан вацI Самур вацIук какахьай чкадал эцигай паркни (и мукьвара эцигнавай ам лап мешреб  алаз аквазвайди тир) селди гъайи кьаради ацIурна.

Хъуьлуьдриз Фулфан вацIу гайи кьван зиянар “Дагъустан” РГВК-каналдай къалурна. Хуьруьн жемятди республикадин гьакимри куьмек гуник, хьанвай зиянар арадай акъудуник умуд кутазва.

С.Абдурашидов,

Хъуьлуьд