И йикъара чав къайи хабар агакьна: 71 йисан яшда аваз чи арадай машгьур манидар, музыкант, адалатлу хизандин кьил, яр-дустунал, мугьмандал рикI алай хъсан инсан Камилов Керим Камилович гьамишалугъ яз акъатна.
Камилов Керим 1949-йисан 19-декабрдиз Кьурагьрин хуьре къуллугъчидин хизанда дидедиз хьана. 1966-йисуз ада Хивда юкьван школа акьалтIарна
Адан зегьметдин биография 1967-1970-йисара Кьасумхуьруьн райисполкомдин культурадин отделда райондин библиотекадин кIелзавайбурун залдин заведующийдин къуллугъдилай гатIунна.
1970-йисуз Советрин Армиядиз фена. Армиядилай гуьгъуьниз кьисметди ам Къазахстандиз акъудна. Ана “Узеннефть” НГДУ-да 1989-йисалди нафтIадин буругъар капитальнидаказ ремонтунин рекьяй оператор, мастер яз кIвалахна. КIвалахни ийиз, 1983-йисуз Гурьев шегьердин политехнический техникумни акьалтIарна.
1989-йисуз ана кьиле фейи миллетчивилин гьерекатар себеб яз, ам хизан галаз ЦIийи Макьарал хтана. Халкьдин “Касумкент” ансамблдин хормейстер яз, райондин культурадин кIвалин методиствиле кIвалахна.
1991-йисалай вичин уьмуьрдин эхиримжи йикъалди К.Камилова ЦIийи Макьарин СДК-дин художественный руководитель яз кIвалахзавай.
Машгьур манидар ва музыкант тир Керим Камилова Сулейман-Стальский районда, республикада ва адалай къецени кьиле фейи хейлин мярекатра активвилелди иштиракна. Фестивалрин, конкурсрин лауреат тир ам гзафбуруз гьакI гьевескар композиторни яз чидай. Адан экуь къамат чи рикIера амукьда.
“Лезги газетдин” редакциядин коллективди Керим Камилович Керимов рагьметдиз финихъ галаз алакъалу яз, адан хизанриз, мукьва-кьилийриз башсагълугъвал гузва.
