Каспийскда гзаф везифаяр тамамардай центради 1-сентябрдиз сифтегьан азарлуяр кьабулна. Ина коронавирусдин азар акатнавайбур сагъардай махсус чка дуьзмишнава. Идан гьакъиндай “Лезги газетдиз” РД-дин Минздравдин пресс-къуллугъди хабар гана.
Азарлуяр тади куьмекдин бригадайри агакьарзава, гьакIни участокдин духтурди теклифуналди рекье твазва. Алай аямдин вири истемишунрихъ галаз кьадайвал эцигнавай центрада 76 койка кардик ква. Абурукайни 60 инфекцийрин стационардин агалай жуьредин боксар ва 16 койкани реанимациядинбур я. Центр девирдин истемишунрихъ галаз кьадай техникадалди таъминарнава — стационарда клиникадин ва ПЦР-дин лабораторияр, рекъемрин рентген, УЗИ, гьакIни санай-масаниз тухуз жедай УЗИ – дин ва рентген-установкаяр, компьютердин томографиядин аппарат, гемодиализ кьиле тухудай алат, гьакIни коронавирус акатнавай залан азарлуйрин иви махсусдаказ ахтармишдай ЭКМО аппарат кардик ква.
Гьар са боксдихъ вичин хсуси санузел ава. Азарлуяр гзаф къулай цIийи жуьрейрин кроватрал къаткурнава.
«Лезги газет»
