— 1-сентябрдин йифен сятдин 10 тамам жез 17 декьикьа амайла, Махачкъалада Гьамидован куьчеда авай 59 «а» нумрадин гзаф квартирайрикай ибарат тир 5 мертебадин кIвалерин 4-мертебада цIай кьунвайдакай пожарный кьилин пунктуниз и мусибатдин шагьид хьайи касдилай хабар атана,- хабар гузва РФ-дин МЧС-дин РД-да авай Кьилин Управленидин пресс-къуллугъди.
Тади гьалда и чкадал (1-нумрадин вызовдин рангдин расписанидал асаслу яз) 10 касдикай ва 3 машиндикай ибарат тир цIаяр кьуникай къутармишдайбурун (пожарно-спасательный) подразделенийрин къуватар рекье туна.
ЦIай кьунвай чкадал сятдин 10 тамам жез 7 декьикьа амаз агакьай къаравулдин къуллугъдин начальникди цIай кьунвай квартирада инсанар аваз хьун мумкин тирдакай хабар гана (1-БИС нумрадин вызов малумарна). Анал алава такьатар — 20 кас ва 6 машин, гьа гьисабдай яз Россиядин МЧС-дин Дагъустан Республикада авай Кьилин Управленидин ЦУКС-дин дестени рекье хтуна.
Йифен сятдин 11-даз 20 декьикьа кIвалахайла, цIай хкадариз алакьна.
ЦIай кьунин нетижада кьейибур ава. Виликамаз авай малуматдалди, са дишегьли ва 4 аял телеф хьана.
ЦIай хкадарунин кардал РСЧС-дин чIехи десте, вири санлай 63 кас ва 18 машин (абурукай 37 кас ва 10 машин Россиядин МЧС-динбур тир ) желбнавай.
Газет чапдиз вахкудайла, малум хьайивал, цIай кьуниз талукь яз Дагъустандин прокуратуради ахтармишун тешкилнава. Алай вахтунда цIай кьунин себебрай кьил акъудзава. Ахтармишунрин нетижада жавабдар ксарин кIвалахдиз, гьа гьисабдай яз цIаяр кьуникай хуьнал ва газдин тадаракар ишлемишунал гьалтайла хатасузвал таъминарунин законодательстводин истемишунар кьилиз акъудунизни къимет гуда.
Прокуратуради гзаф квартирайрикай ибарат тир кIвале яшамиш жезвай агьалийрин ихтиярар хуьнни гуьзчивилик кутунва.
Россиядин СК-дин Дагъустан Республикада авай Силисдин управленидин делилралди, цIун хура кьве квартирада яшамиш жезвай ксар гьатна. Мадни хабар гузвайвал, цIай кьур кIвале кьве аял телеф хьана. Адалай са мертебадин винел кIвале яшамиш жезвай жегьил дишегьли ва адан гъвечIи кьве аял угардин газдилай зегьерламиш хьана кьена.
Уголовный дело къарагъарнава.
* * *
Чна умудзава хьи, ихьтин мусибат арадал атунай талукь органри кьил акъудда. Тахсиркарри жаваб гуда.
ЦIай кьунин себебар гьихьтинбур ятIа, гьелелиг чизвач… Амма чаз цIаяр кьуникай хуьнин ва хатасузвал таъминарунин къайдайрал амал авуниз, мукъятвал квадар тавуниз мад сеферда эвер гуз кIанзава. Зул алукьнава. КIвалера чимивал гудай (газдин, электричестводин) тадаракар ишлемишдай вахт мукьва жезва. Гьаниз килигна, гьар са касди абур ишлемишдалди вилик гъавурдик квай пешекаррив ахтармишиз туртIа, лазим аваз хьайитIа, ремонтна (ва я цIийибуралди эвезна), жуван ва хизандин уьмуьрдин, гьакI сагъламвилин патахъай къайгъу чIугуртIа, хатасузвал таъминарайтIа, хъсан я.
Рагнеда Рамалданова
