Заз жуван и макъалада гзаф къени инсан, чешнелу педагог тир  Мегьамедрасулов  Вадим  Наврузбеговичан  уьмуьрдин рекьикай суьгьбет ийиз кIанзава.

Вадим Наврузбегович 1971-йисан 31-мартдиз Мегьарамдхуьруьн райондин Гъепцегьрин хуьре экуь дуьньядал атана. Адан буба райондин ОВД-дин инспектор тир, дидеди лагьайтIа, “Муктадирский” совхозда кIва­­лахзавай.

1986-йисуз 8-класс акьалтIарай В.Мегьа­медрасулов Воронежский областдин Павловск шегьерда авай хуьруьн майишатдин техникумдик экечIна. Ана техник-гидротехник пешедай диплом къачур жегьилдиз армиядин жергейриз эверна. 1992-йисан апрелдиз В.Мегьамедрасулов хайи хуьруьз хтана. Советрин Союз чкIанвай, уьлкведи муракаб девир кечирмишзавай.Ихьтин шартIара Вадим Мегьамедрасуловаз пешедин рекьяй кIвалах жагъанач. Адаз маса пеше хкягъун кьисмет хьана. 1992-йисуз В.Мегьамедрасулов ДГПУ-дин математикадин факультетдик экечIна. Ина кIелни ийиз, ада Приморскдин школада кIвалахни авуна. 1993-йисан ян­вардилай ам Гъепцегьрин школада мате­ма­тикадин муаллимвиле кIвалахал кьабулна.

Педагогвилин кеспидив эгечIай гьа сифте йикъарилай Вадим Наврузбеговича вич хиве авай жавабдарвал аннамишзавай, пар квай муаллим яз къалурна. Чирвилер гунин жуьреба-жуьре къайдайрикай кардин гъавурда аваз менфят къачузвай адан тарсар гзаф итижлудаказ кьиле физва.

В.Мегьамедрасулова  вичин предметдай мукьвал-мукьвал классдилай къецяй тир се­ренжемар, адет хьанвай кIалубринбур тушир ачух тарсар тухузва, цлан газет акъудзава, ученикрин яратмишунрин кIвалахдихъ галаз алакъалу вижевай материал кIватIна­ва.

Ученикрин  зигьиндин кIвалах деринарун, ге­гьеншарун патал ада алава тарсар тухузва­, школьникар олимпиадайриз гьазурзава. Адан гъилик чирвилер къачузвай аялри  олимпиададин райондиз талукь паюна гьар йисуз приз­­дин чкаяр кьазва. Вадим Наврузбеговичан гъи­­лик чирвилер къачузвай Гьажиметова­ Диа­на, Нагъиева Лейла, Мирзаметова Эр­зи ва Гьа­жиев Амир Вирироссиядин школьникрин арада информатикадай кьиле тухвай олим­пиададин муниципальный паюна гъалиб хьана.­ Абуру республикадин дережада аваз ДГТУ-да тешкилай олимпиададани ишти­ракна.

2012-йисуз Вадим Наврузбегович информационно- коммуникативный технологийрин (ИКТ) рекьяй директордин заместителвиле тайинарна. А чIавуз школада компьютеррал кIвалахиз чизвайди анжах 4 муаллим тир. Компьютеррин барадай савадлу хьун алай ма­къамда мектебда агалкьунралди кIвала­хунин чарасуз шартI тирдахъ кIвалахдин рекьяй юлдашар инанмишарун патал Вадим Наврузбеговича еке чалишмишвилер авуна.

2014-2015-кIелунин йисуз ада интерактивный “Uci. Ry” платформадал са жерге олимпиадаяр тешкилна. Адан ученикрихъ “Инфоурок” проектдихъ галаз алакъалу, арада­ мензил­ аваз кьиле тухузвай международный олимпиададин, информатикадай “Uci.ry” би­не­­­дал­лаз кьиле тухвай Онлайн олимпиа­дайрин, математикадай “плюс” лишандик кваз тух­вай Онлайн  олимпиададин  сертифи­катар  ава.

В.Н.Мегьамедрасулова датIана вичин чир­вилерин дережа хкажзава, ам аялриз тарсар ва тербия гунин цIийи рекьерихъ ва къайдайрихъ галатун тийижиз къекъвезва. Информатикадин тарсар гузвай муаллимрин се­минаррал ва ихьтин маса мярекатрал экъечI­на рахазвай ада вичин кIвалахдин тежриба агалкьунралди раижзава.

Вадим Мегьамедрасулова аялрин проектрин кIвалахризни регьбервал гузва. Абурун жергедай яз, “Зи рикI алай компьютерный программаяр”, “Аялрин уьмуьрда компьютерный къугъунрин роль”, “Интернет гьикI туькIуьр хьанва?”, “Вирусриз акси машгьур программный такьатар”, “Виридалайни машгьур онлайн — къугъунар”, “Интернетдилай аслу хьун алай аямдин обществодин тIал алай месэла я” ва маса проектрин тIварар кьаз жеда.  В.Мегьамедрасулова кIелунрин эхиримжи пуд йисуз  ИКТ ишлемишуналди алай девирдин истемишунрихъ галаз кьазвай а истемишунрин гъавурда твазвай са жерге ачух тарсар тухвана.  В.Н.Мегьамедрасулов 271-нумрадин ППЭ-да (Мегьарамд­хуьруьн 1-нумрадин СОШ), технический пешекар, информатикадин рекьяй олимпиадайрин кIвалахар ахтармишдай  муниципальный  экспертрин комиссиядин, райондин школайра информатикадай тарсар гун авай гьал ахтармишдай махсус комиссиядин член, районда  урус литературадай “Умники ва умницы” лишандик кваз зигьин ахтармишдай къу­гъун, ва математикадай “Виридалайни акьул­луди” къугъунар кьиле тухудай чIавуз техни­ческий эксперт яз майдандиз экъечIзава.

Вадим Наврузбегович муаллим-наси­гьат­чи я. Ада ДГПУ-дин, Дербентдин педколледждин ва гьа шегьердин социально-педагогический институтдин студентрин педпрактикадиз регьбервал гана.

Ада, аквадай хьтин куьмек гуналди, районда  муаллимрин йисаз, райондин юбилейриз талукь ва  са жерге маса мешреблу мярекатар кьиле тухвана.

В.Мегьамедрасулов къазанмишнавай дережадал рази хьана акъваззавач. ИкI, эхиримжи пуд йисуз райондин методкабинетди Гъепцегьрин школадин бинедаллаз  информатикадай муаллимрин са шумуд семинар тешкилна.

Вадим  Наврузбегович гьуьндуьр дережадин муаллим я. Ада неинки  хайи хуьруьн школадин, гьакIни Мегьарамдхуьруьн райондин маса мектебрин муаллимриз ИКТ ишлемишуналди ачух тарсар тешкилунин ва кьиле тухунин барадай куьмек гузва. В.Мегьамедрасуловаз Международный “Инфоурок” проектдин кIвалахда иштирак авунай, вичин гъилик информатикадай чирвилер къачузвай аялри “Учи.ру” олимпиадада агалкьунралди иштирак авунай са шумудра махсус дипломар, сертификатар, маса шабагьар гана.

Гзаф йисара гьакъисагъвилелди зегьмет чIугунай, къуллугъдин везифаяр чешнелудаказ кьилиз акъудунай В.Н.Мегьамедрасулов Мегьарамдхуьруьн райондин образованидин управленидин, и муниципальный райондин жегьилрин крарин ва туризмдин рекьяй­ отделдин гьуьрметдин грамотайриз лайихлу хьана.

Вадим Наврузбегович неинки къени инсан, тежрибалу педагог, гьакI тербиялу пуд ве­леддин бубани я.

Инсанвиляй, аялрал рикI хьунай, абуруз дерин чирвилер гунай образованидин управленидин коллективдин ва кьилди жуван патай Вадим Наврузбеговичаз сагърай лугьуз кIанзава. Къуй акьалтзавай несилдиз дуьзгуьн тербия ва дерин чирвилер гунин баркаллу рекье квехъ гележегда мадни гьуьндуьр дережадин агалкьунар хьурай, гьуьрметлу муаллим.

З.К. Бабаева, Мегьарамдхуьруьн райондин методкабинетдин методист