Виликдай зун, къуьне — фотоаппарат, гъилени блокнотни къелем аваз, макъалаяр гьазуриз, мукьвал-мукьвал Герейханован тIварунихъ галай совхоздин мулкариз, багълариз, салариз, техилар кIватI хъийизвай никIериз, консервиярдай заводдиз, медениятдин маканриз фидай. Гьар сеферда аквазвайбур, кьве гъил къакъажна, пелекай гьекь кIвахьиз, кIвалахзавай лежберар, емишарни майваяр кIватI хъийизвай зегьметкешар, улакьриз туькер ягъиз, чкадал агакьариз, таяяр эцигзавай устIарар тир. Са гафуналди, гьинихъ вил вегьейтIани, кьуд пата кIвалах ргазвай.
Чилел кIвалахзавайбурун зегьмет газетрайни телевиденидай раижна кIанзавай. Са сеферда райгазетдин редакциядин тапшуругъдалди за совхозда зегьмет чIугвазвайбурукай нубатдин макъала гьазурзавай. Гайи тапшуругъ за, гъиле-гъилди тамамарна, пакадин юкъуз редакциядиз агакьарна. А чIавуз редактор Саид Алиметова заз икI лагьанай: “Ваз молодец, Набиев! Вун са йикъан къене шикилар ягъиз, макъала кхьиз, абур зал агакьариз гьикI агакьзава? Зун валай гзаф рази я. Гьа икI давамара, вакай хъсан журналист жеда…”. За, ада лагьайвал, жуван кIвалах давамарнай.
Герейханован совхоздикай рахайтIа, ам, гьи рекьяй къачуртIани, вилик жергейра авай майишат тир. Совхозда жуьреба-жуьре йисара майишатдихъ рикI кузвай хъсан тешкилатчияр тир М.Бачханова, И.Исмаилова, Б.Гьажиханова, Р.Исакьова, Б.Абдуллаева, М.Муслимова, Н.Нагъиева ва масабуру кIвалахна. Гьахьтин кар алакьдай ксар себеб яз, совхоздикай миллионер хьанай, зегьметчийриз виниз тир мажибар, премияр ганай. Ибур 1970-1985-йисар тир.
Заз рагьметлу Бейдуллагь Абдуллаева регьбервал гайи комсомолринни жегьилрин бригада рикIел хкиз кIанзава. Ам районда тешкилнавай сифтегьанбурукай сад тир. Майишатдихъ экономикадин рекьяй жезвай агалкьунрик и бригададин лайихлу пай квай. Хутар, ичер, жумар, чуьхверар битмишарунай планар ада вахтунда ва артухни алаз тамамарзавай. Бригададин вири членар (30 кас) зарбачияр, пятилеткадин гъетер тир. Къазанмишзавай агалкьунрай ам са шумуд сеферда райкомдин, обкомдин, ЦК-дин гьуьрметдин грамотайриз, маса шабагьриз лайихлу хьанай. Б.Абдуллаеван шикил хейлин йисара республикадин Гьуьрметдин доскада гьатнай. Ам кар алакьдай тешкилатчи тир. ДатIана адакай пленумрал, конференцийрал, маса мярекатрал тарифдин гафар лугьудай, ам чешне яз къалурдай. Вичин нубатда, Б.Абдуллаева агалкьунар къазанмишунин сирерикай, тежрибадикай суьгьбетардай, зегьметкешриз меслятар къалурдай, насигьатар гудай.
Райондин “Коммунизмдин гатфар”, республикадин “Комсомолец Дагестана” газетриз мукьвал-мукьвал Б.Абдуллаевакай, ада регьбервал гузвай бригададикай тарифдин макъалаяр акъатдай. И бригададилай чешне къачуна, “Зардиянский”, “Коммуна”, “Калининский”, “Самурский” совхозра, Кьасумхуьруьн консервиярдай заводда бригадаяр арадал гъанай.
Бейдуллагь Абдуллаев хьтин инсанар чи йикъарин жегьилриз кутугай чешне я. Гьахьтин ксар рикIел хкуналди, чна акьалтзавай несилриз кагьулвал тавуниз, зегьмет чIугуниз, рикIе къаст туниз эвер гузва.
Райсудин Набиев
