НекIедин тар
Чилин винел гьам рангунин, гьамни тIямдин жигьетдай некIедиз ухшар миже гузвай тарар экъечIзава. Илимда адаз “бросимум” лугьузва. Амма винидихъ къейднавай лишан себеб яз адал “некIедин тар” тIварни акьалтнава. Ажайиб тарцин мижедик яд, набататрин мум, шекер ва шкьакь ква.
Кьиблепатан Америка адан ватан яз гьисабзава. Тарцикай миже хкудун патал инсанри адан тандал алай чкалдай кьацIар акъудзава. Бязи чешмейра къейднавайвал, и мижеди калин нек эвеззава, набататрин мумдикай шемер ва кендирагъар гьазурзава. Илимдин ахтармишунри тестикьарзавайвал, “некIедин тарцин” мижедихъ адетдинди тушир ял гала ва ам лап чими шартIарани гьафтедин къене чIур тахьана амукьзава.
“Бросимумдин” кьакьанвал 30 метрдив агакьзава. Адал емишарни экъечIзава. Амма абур недайбур туш. Кьиблепатан Америкадин агьалийри и тар чпиз тIебиатдин патай ганвай савкьатдай гьисабзава ва адан некIедикай хийир къачузва.
Хважамжамдин эвкалипт
И тарцин кьетIенвал ам я хьи, адан тан жуьреба-жуьре рангарикай ибарат я. Гьавиляй адаз хважамжамдин эвкалипт лугьузва.
Ам ЦIийи Британиядин, ЦIийи Гвинеядин, Минданаодин, Сулавесидин, Серамдин мулкарал экъечIзава. Адан кьакьанвал 75 метрдив агакьзава. Тандин яцIувили лагьайтIа, 2,4 метр тешкилзава.
Къелем тир вахтунда эвкалиптдин тан къацу рангунинди я. ЧIехи жердавай, къацу ранг вили, беневшадин, мичIи яру ва маса рангари эвеззава. Санлай къачурла, тар яргъирушаз хас вири рангаралди девлетлу я.
Эвкалиптдин мад са кьетIенвал ам я хьи, адан танди рангар мукьвал-мукьвал дегишарзава.
Гьазурайди — Агьмед Магьмудов
