Сулейман-Стальский райондин сайтда хабар ганвайвал, августдин вацран сифтегьан пуд гьафтеда футболдай Ажадуллагь Жарулаеван къаматдиз бахшнавай районрин уртах турнир хьана. Юбилейдинди, яни спортдин XX лагьай и серенжем Агъа СтIалрин хуьре, А.Жарулаеван тIварунихъ галай стадиондал, футбол къугъунин вири къайдайрал амал авуналди кьиле тухвана.
ИкI, 14 ва 15-августдиз турнирдин кьудакай сад лагьай пай патал акъажунра “Дербент” — “Садвал”, “Герейханово” — “Леки”, “Олимп” -”Кюре 2”, “С.К.Джарулаева” — “Кюре 1” командайри чпин устадвал къалурна. Къизгъиндаказ кьиле физвай бягьсерин нетижа гьихьтинди жедатIа лугьун четин кар тир. Футболистри тамашачийриз еке устадвилелди ва са декьикьадани уяхвал квадар тавуна кьиле тухузвай къизгъин ва итижлу бягьсер багъишна. Гьар гьикI ятIани, кьве гьафтедилай ярумчух финалдиз акъатай 4 команда малум хьана. Абурун арада авай: “Леки” (Мегьарамдхуьруьн район), “Кюре-2” ва “С.К.Джарулаева” (кьведни — Сулейман-Стальский район) ва “Дербент” (Дербент шегьер). 4 ва 3-чкаяр, талукь тирвал, “Дербент” ва “Кюре” командайри кьуна.
Финалдин акъажунра “С.К.Джарулаева” ва “Леки” командайрин футболистри чпин устадвал къалурун лазим тир. Къугъунин лап эхирдалди кьве командадини къизгъин ва гзаф итижлу бягьсералди тамашачияр шадарна. Нетижада “Леки” команда гъалиб хьана. 2-чкадал “С.К.Джарулаева” команда акъатна.
Гъалиб хьайибурув ва призёррив пишкешар вахкуниз талукьарнавай шад мярекатда Сулейман-Стальский райондин кьил Нариман Абдулмуталибова, общественный деятель ва меценат Мамед Абасова, Агъа СтIалрин хуьруьн кьил Низами Абдурагьманова, турнирдин тешкилатчияр тир Рафик, Вагиф ва Жарулагь Жарулаеври иштиракна. Аниз мадни чи уьлкведин маса регионрай ва Къазахстандай тир машгьур спортсменриз ва мугьманризни эвер ганвай.
— Гьуьрметлу футболистар, тамашачияр, футболдал рикI алай вири ксар! Куьне спортдин и жуьре гзаф машгьур тирди ва адал виридан рикI алайди мад сеферда субутна. Гъалиб хьайибуруз ва призёрриз чна мубаракзава, виридан рикIера яргъалди амукьдай итижлу къугъун багъишунай турнирда иштиракай вири командайриз сагърай лугьуз кIанзава. Ажадуллагь Жарулаеван тIварунихъ галай, адан экуь къамат рикIел хуьнин лишан яз кьиле тухузвай турнир райондин спортдин уьмуьрда лишанлу вакъиадиз, хъсан адетдиз элкъвенва. Чун ам инлай кьулухъни вилик тухуз чалишмиш жеда. Шад жедай кар мадни ам я хьи, чи райондай и турнирда пуд командади иштиракна. Абурукай кьвед призёрар хьана. Турнир акьалтIаруниз ва гъалиб хьайибурув пишкешар вахкуниз талукьарнавай шад мярекатни лишанлу юкъуз — Россиядин Государстводин пайдахдин Юкъуз кьиле тухузва. ГьикI хьи, Государстводин пайдах ватанпересвал къалурзавай, дамах кутазвай уьлчме я. И юкъуз чна чун чIехи уьлкведин пай тирди иллаки аннамишзава ва адан агалкьунрал дамахзава. Ватанпересвилин гьиссер акьалтзавай несилдив агакьарунихъ еке метлеб ава. Чи гьар садан гражданвилин фикиррилай, Ватандихъ авай кIанивилелай чи уьлкведин ва вири Россиядин гележег аслу я, — къейдна Нариман Абдулмуталибова.
Мярекатдал гъалибчийрив ва призёррив кубокар, грамотаяр, къиметлу ва пулдин пишкешар вахкана. Турнирдин иштиракчийриз “Виридалайни хъсан варар хуьдайди”, “Виридалайни хъсан защитник”, “Виридалайни хъсан полузащитник”, “Виридалайни хъсан гьужумдайди”, “Виридалайни хъсан судья” ва икI мад номинацийрайни пишкешар гана. Мярекатдин сергьятра аваз женгинин самбодай дуьньядин чемпион Икрам Алискеровавни рикIел аламукьдай пишкеш агакьна.
Турнирдин макьсад футбол вилик тухун, бажарагъ авай футболистар винел акъудун ва абуруз куьмекар гун, гьакIни республикадин районрин спортсменрин арада дуствал мягькемарун тир.
Къейд авун лазим я хьи, футбол, гьакIни физический культура ва спорт вилик тухун патал Сулейман-Стальский районда мини-футболдин майданар туькIуьруниз артух фикир гузва. Райондин чIехи пай хуьрера мини-футбол къугъвадай алай аямдин (тIебии тушир чIур алай) майданар гьазурнава. И кар чкадин бюджетдин ва бюджетдинбур тушир фондаринни меценатрин такьатрихъ, гьакIни жуьреба-жуьре госпрограммайрин гьисабдай кьилиз акъудзава. Спортдин объектар эцигуниз, санлай спорт вилик тухуниз районда инлай кьулухъни артух фикир гун пландик ква.
Чи мухбир
