Бажарагълу лезги манидар Селим Абдулазизович Алагьяров “Голос” шоуда гъалиб хьайидалай кьулухъ уьлкве тирвал машгьур хьана.
Селим Алагьяров 1987-йисан декабрдиз Грозный шегьерда дидедиз хьана. Чечняда сад лагьай дяве кьиле фейидалай кьулухъ адан хизан Дербент шегьердиз, ахпа Махачкъаладиз куьч хъхьана.
Селима хиве кьазвайвал, ада гъвечIи чIавалай манияр тамамариз, конкурсра иштиракиз эгечlна. Къейдна кIанда хьи, Селиман диде Майя Рагьимхановна музыкадин рекьяй муаллим я. Жегьил манидардин буба хирург я, ада Дербентдин медколледжда кIвалахна.
Селимаз гьеле аялзамаз машгьур жедай, Италиядин Лучано Павароттидин мектебдиз кIелиз фидай мумкинвал хьанай. А чIавуз гъвечIи Селиман бажарагъди Азербайжанда авай Италиядин векил М.Косто гьейранарнай. Музыкадин рекьяй кIелун патал Италиядиз ракъурдай фикирдал атайла, Селиман вилик Азербайжандин ватандашвал кьабулунин шартI эцигна. Амма 8 йисан яшда авай Селима, ватанпересвал къалуруналди, а кардик кьил кутунач.
Селиман алакьунрикай хабар хьайи Дагъустандин машгьур композитор ва муаллим Мурад Кажлаева 1999-йисуз ам А.Свешникован тIварунихъ галай хордин искусстводин академиядиз (исятда академия адан бине кутур В.С.Попован тIварунихъ гала) кьабулна. Такьатрин жигьетдай четинвилера гьатуниз килигна, са тIимил чIавалай диде-буба чпин гада кIвализ хкуниз мажбур хьана.
Гуьгъуьнлай, Махачкъалада Готфрид Гьасанован тIварунихъ галай музыкадин училище акьалтIарайдалай кьулухъ, Селима вичин вилик Москвада авай Гнесинан тIварунихъ галай музыкадин машгьур училищедик экечIдай макьсад эцигна. Гьар вуж хьайитIани кьабул тийизвай училищедик экечIдайла, Селима конкурсдин комиссиядин векиларни тажубарна. ИкI, четин синагърайни имтигьанрай регьятвилелди акъатай Селимакай, дагъустанвийрикай сад лагьайди яз, Москвадин музучилищедин академический пенидин факультетдин студент хьана. Ина адан вилик вичин рикI алай кардин, пешедин рекьяй мадни вилик фидай рекьерни мумкинвилер ачух хьана. Манияр тамамарунин устадвилин рекьяй международный школадин бине кутурбурукай сад тир ва анин регьбер, хордин искусстводин академиядин профессор Дмитрий Вдовина, вирибурукай хкяна, анжах Селим вичин школадиз кьабулна. Ина Селима А.Ведерникован ва С.Москалькован регьбервилик кваз чирвилер, вердишвилер артухарна.
С.Алагьяровахъ лирикадинни драмадин надир сес ава. Музыкадин, манидарвилин рекье адахъ хейлин конкурсра агалкьунар хьанва. Ам “Перепелочка”, “Таланты XXI века”, “Марьяна” ва хейлин маса конкурсрин гъалибчи я. Манидардин репертуардик Италиядин барокко стилдин куьгьне манияр, гьакIни постмодернизмдин эсерар ква. Селимаз виридалайни кроссовер (неоклассика) стиль мукьва я.
2016-йисан сентябрдиз С.Алагьяров 5-сеферда яз кьиле фейи манийрин международный «Золотой голос России» фестивалдин Гран-придиз лайихлу хьана. Виш манидарди иштиракай и чIехи конкурсдин жюридин кьиле дуьньядин операдин сегьнеда машгьур Любовь Казарновская акъвазнавай.
Селима лезгийрин медениятдин мярекатрани иштиракзава. 2015-йисуз ам Москвадин медениятдин центради “Дагъустандиз вафалувал къалурунай” медалдалди къейдна.
Алатай йисара Грозный шегьерда кьиле фейи “Суперзвезда” конкурсда Селим вичин командадин насигьатчи хьана.
1-каналди къалурай “Голос” конкурсда къачур гъалибвал Селим Алагьярован виридалайни зурба агалкьун хьана. Хъсан тежрибани алакьунар авай манидарди М.Магомаеван “Чертово колесо” мани тамамарна ва ам Александр Градскийди вичин командадиз кьабулна. “Голос” конкурсдин финалдин пай 2017-йисан 29-декабрдиз кьиле фенай. Нетижада тамашачийри гъалибвилиз Селим лайихлу тирди тестикьарнай. Селиман агалкьуни вири ватанэгьлийрик, дагъустанвийрик, чеченвийрик ва масабурукни дамах кутунай.
2017-йисуз адаз “Дагъустандин лайихлу артист” тIвар гана. 2017-йисалай, “Голос” конкурса гъалиб хьайидалай кьулухъ, адакай А.Градский кьиле авай “Градский Холл” театрдин манидар хьана. И театрда галаз-галаз кьве йисуз тешкилай Селиман кьилдин концертдин зал сиве-сивди ацIана. Театрдин кIвалахдилай гъейри, С.Алагьярова манияр тамамарунин рекьяй вичин авторвилин “АСА” (Академия Селима Алахярова) школани ачухнава. Машгьур композиторрихъ галаз кIвалахуналди, Селима вичин репертуар цIийи манийралди гегьеншарзава. Музыкадихъ галаз алакъалу гзаф проектра, конкурсра, жюридин векил яз, ада датIана иштиракзава.
Зурба алакьунар авай ватанэгьлидихъ къуй сагъвал ва гьамиша гъалибвилер хьурай!
Куругъли Ферзалиев
