Зегьметдикай хьанач къерех,
Давамариз бубадин рехъ.
Илгьамди ваз гурай гьевес,
Хкаждайвал “Самурдин сес”…
Лугьуда хьи, чекмечидин хци мих пIузаррив кьада, дерзичидин хци карандаш япук кутада. ГьакI хьайила, Мурадалиев Рамзесани вичин рагьметлу бубадин рехъ давамарун, журналиствилин пеше хкягъун мягьтел ва тажуб жедай кар туш.
Мегьарамдхуьруьн 1-нумрадин юкьван школа лап хъсан къиметар аваз куьтягьай Рамзесан вилик гележегдин пеше хкягъунин везифа акъвазнавай. ЮкIвар-чипIер гзаф яна, ада жуьреба-жуьре карханайра зегьмет чIугуна, вичин зегьмет вичиз акуна, яни гьар са кардин писни хъсан чирна…
Армиядин жергейра къуллугъна хтана, Махачкъаладин автодорожный техникумда юриствилин диплом къачуна,1996-йисалай Рамзес “Самурдин сес” газетдин редакциядиз мухбирвиле кIвалахал къвезва. Сифте камар… Абур гьихьтинбур хьана? Гьелбетда, четинвилерни акьалтна. “Сифте камар гьамиша четинбур жедайди я, — лугьузва Рамзеса. — А вахтунда чи редакцияда чпихъ тежриба авай, вири рекьерай чранвай журналистар авай: Абетуллаев Гъани, Гьасанов Алибег (рагьметар хьуй чпиз). Гьажиев Фикрет Мирзоевич жавабдар секретарь тир, зи буба — рагьметлу гьажи Желил Пиралиевич — редактор. Абетуллаев Гъаниди заз еке куьмекар гана: гьар са темадин, кхьенвай макъаладин винел кIвалахиз, вичи лагьайвал, “рандадай” акъудиз, гьар са цIарцIел кIвалахиз чирна. Фикрет Мирзоевичан школа кьетIенди тир: са макъалани, са цIарни вичи кIел тавуна ахъайдачир. Ам, илгьамдикай пай ганвай кас хьиз, хъуьтуьл къилихрин, умун хесетрин инсанни тир. Гьар са куьлуь-шуьлуьдин гъавурдик кутадай, вичин фикирар лугьудай. Ихьтин юлдашрин куьмекди зун къенин дережадиз акъудна. За икрамзава абуруз, гьуьрметдивди рикIел хкизва. Къе зи хиве газетдин жавабдар секретарвилин везифаяр авайла. За кIевелай аннамишзава Фикрет Мирзоевичан зегьмет, кIвалахда адан дикъетлувал, вичин кIвалахдив жавабдарвилин гьисс гваз эгечIун. Им заз еке тарс хьана…”
Рамзес Желиловича вичин суьгьбет давамарзава: — За газетда кIвалахиз саки 24 йис хьанва. Чи коллектив гъвечIиди я, кхьинарзавайбурун кьадарни тIимил я. — Айдемирова Афисат — ст. корреспондент, Шамсудинова Жанна — корреспондент ва Гьажиев Рашид — фотокорреспондент. Исмаилов Абумуслим Абдуселимовичан регьбервилик кваз къуьн-къуьневаз, гъил-гъиле кьуна кIвалахзава чна…
Рамзесан вилик за ихьтин суал эцигна:
— Газетдин чинра куьне гьихьтин темайриз чка гузва ва гьихьтин месэлаяр къарагъарзава?
— Чи газетди райондин гьал-агьвал, адан къенин ва гележегдин мумкинвилер къалурзава.
Газетда кIвалахдин кар алай хилерикай сад хайи чIал хуьн я. И кар фикирда аваз, чна муаллимрихъ, шаиррихъ галаз гуьруьшарни тухузва…
Карчивилел, фермервилел машгъулбурун зегьмет къалурзава, абурун агалкьунар раиж ийизва. Пешекарри райондин экономика хкаждай рекьер къалурдай макъалаяр чапзава. Дяведин ветеранрикай, Афгъанистанда кьиле фейи женгерин иштиракчийрикай макъалаяр акъудзава, районда медицинадин, образованидин хилера тухузвай кIвалахдикай кхьизва.
Чаз ихьтин рубрикаяр ава: “Аялар рахазва”, “Илгьам”, “Дуьньядилай цIар илитIна”, “Жув-жуван жерягь”… Чна чи кIвалахда “Лезги газетдикайни” менфят къачузва, ам чаз чешне я. Са гафуналди, “Самурдин сес” чи райондин экуь чин, ачух вилер я…
Са кьве келима Рамзес Желиловичан хизандикайни лугьун тавуна жедач. Адан уьмуьрдин юлдаш Мелкиназа типографияда бухгалтервиле зегьмет чIугвазва. Абурухъ кьве велед ава, рушни гада. Руш Муъминатахъ вичин хизан хьанва, адахъ юриствилин кьилин образование ава. Гада Пирали Махачкъалада, ДГТУ-да сад лагьай курсунин студент я…
Рамзес Желилович, къуй куь хизанда бахтар, кIвалахда агалкьунар, дережаяр мадни кьакьан хьурай…
“Самурдин сес”, салам, салам!
Атанва ви къаршидиз.
Аллагьяра ийиз икрам,
Рахазва рикI хвешидиз.
“Самурдин сес”, — хъуьтуьл шагьвар,
Хуш я рикIиз мугьман хьиз.
Вун хтай югъ я чаз сувар,
Ава дустар гьейрандиз…
Аллагьяр Абдулгьалимов
