116 йис къейдна
“Unilad” чешмеди хабар гузвайвал, дуьньядин винел виридалайни яшлубурукай сад яз гьисабзавай Америкадин агьали Хестер Форда и йикъара вичин 116 йис къейдна.
Ам Кьиблепатан Каролина штатдин Ланкастер округда тахминан 1904-1905-йисара дидедиз хьана. 14 йис тамам хьайила, ам гъуьлуьз фена. Сад лагьай аял хьайила, и дишегьлидин 15 йис тир. 12 аялдин диде Хестер Форд 68 хтулдин, 125 птулдин ва 120 штулдин чIехи баде я.
Чешмедин делилралди, 108 йис тамам жедалди, ам садрани духтурханадиз фенач ва садан куьмекни галачиз яшамиш хьана. Эхиримжи йисара дидедин патав пуд руш хтанва.
Хестер Фордан кьатIунар, зигьин хци яз ама, масадан куьмек галачиз адавай хуьрек нез, гъвечIи мензилриз физ жезва.
Яргъи уьмуьрдин сир вуч я лагьана хабар кьурла, ада ихьтин жаваб гана: “Са сирни авач. Зун адетдин къайдада яшамиш жезва”.
Коронавирусдиз акси дарман
Китайдин фармацевтикадин Sinopharm (“Синофарм”) корпорацияди коронавирусдиз акси яз гьазурзавай дарман (вакцина) 2020-йисан декабрдин вацра маса гуз эгечIда. “Газета.ru” изданидин малуматралди, адан къимет 150 доллардиз (11 агъзур манат) барабар жеда.
Алай вахтунда дарман международный клиникайра ахтармишзава. И кIвалах куьтягьайдалай кьулухъ, вакцина регистрация ийидайвал я.
Корпорациядин партийный комитетдин секретарь Лю Цзинчжэнян гафаралди, Пекиндин биопрепаратар ахтармишдай институтди йисан къене — 120 млн, Ухандин биопрепаратрин институтди 100 млн вакцинаяр акъуддайвал я.
Кабулда — хъиткьинарунар
“Tolo News” агентстводи хабар гузвайвал, Афгъанистандин Кабул шегьердин са шумуд районда ракетайрин са шумуд снаряд хъиткьинна.
Уьлкведин МВД-дин делилралди, ракетаяр рекьяй физвай кьве улакьдай ахъайна. И вакъиадин шагьидар хьайибурун гафаралди, кьейибур авач. Хирер-кьацIар хьайи са шумуд кас духтурханадиз агакьарна.
Афгъанистандин мулкарал кардик квай экстремистрин са дестедини и кар вичел къачунвач.
Къейд ийин хьи, Кабулда ягъунар, хъиткьинарунар мукьвал-мукьвал жезва. Мисал яз, са шумуд югъ идалай вилик, 11-августдиз, шегьерда улакьда эцигнавай микьнатIисдин мина хъиткьинна. Нетижада са кас кьена, кьведал хирер хьана.
3-августдиз минаяр эцигнавай улакь хъиткьинарунин нетижада вад кас телеф, яхцIурни кьве касдиз жуьреба-жуьре хасаратвилер хьана.
Къадагъа авунва
Кеферпатан Кореядин регьбер Ким Чен Ына уьлкведин агьалийриз кIвалера кицIер хуьн къадагъа авунва. “Лента.ru” изданидин малуматралди, ихьтин къарар кьабулун Ким Чен Ына кицIер капитализмдин гужлу яржар яз гьисабунихъ галаз алакъалу я.
Бязи изданийри хабар гузвайвал, ихьтин къарар кьабулунин асул себеб уьлкведа недай-хъвадай суьрсетдихъ галаз алакъалу яз арадал атанвай четин гьалар я. Чкадин агьалийривай къастуналди кицIер вахчузва ва абур я зоопаркриз вахкузва, я ресторанриз маса гузва.
Виликдай СМИ-ри хабар гайивал, США-дин гьайванар хуьдай “Humane Society International” обществодин векилри Кьиблепатан Кореяда 70 кицI къутармишна. Абуру кицIин як гьялзавай ва маса гузвай фермадиз ихьтин “карчивал” акъвазарун теклифна.
Дуьздал акъудна
США-дин юстициядин министерстводин векилри 10 йисалай виниз Китайдин хийирдиз жасусвал (шпион) авур ЦРУ-дин виликан къуллугъчи дуьздал акъудна. Идакай “Лента.ru” чешмеди хабар гузва.
Александр Юк Чин Ма США-дин гражданин я. Адан гафаралди, 2001-йисуз Пекиндин разведкади адаз сифте яз США-дикай малуматар агакьарунай 50 агъзур доллар гана. Гуьгъуьнлай и кар 10 йисан къене давам хьана.
Александр Юк Чин Мади гила вичин уьмуьрдин амай пай дустагъда ахкъудда. Алай вахтунда адан 67 йис хьанва. Идалай гъейри, ЦРУ-да къуллугъ авур адан мукьва-кьилидини Китайдин хийирдиз кIвалахна.
Чешмеди хабар гузвайвал, ЦРУ-да кIвалахай 1982-1989-йисара Александраз сирлу малуматрикай делилар кIватIдай мумкинвал хьана. Гуьгъуьнлай ада ФБР-да таржумачидин везифаяр тамамарна. Инани жасусди вичин асул кIвалах давамарна.
Къейд ийин хьи, ЦРУ ва ФБР США-дин хатасузвал таъминарзавай къурулушар я.
Эхиримжи йисара Китайдин ва США-дин арада алакъаяр векъибур яз ама. Уьлквейри алишверишдин дяве кьиле тухузва.
«Лезги газет»
