Къадим Дербент иниз гьар санай, гьа жергедай яз къецепатан уьлквейрайни къвезвай мугьманрин, туристрин рикI алай макандиз фадлай элкъвенва. Дагъустандиз сиягьат ийизвай, мугьман жезвай гьар гьи кас хьайитIани, ачух цавун кIаник квай музейдиз — Нарын-къеле цитаделдиз килиг тавуна бажагьат хъфизва…
Къейдна кIанда хьи, къадим шегьер вири уьлкведин туриствилин меркездиз элкъуьрун патал эхиримжи вахтара генани артух мумкинвилер жагъурзава. И барадай шегьердин кьил Хизри Абакарован чалишмишвилер екебур я. ИкI, ада кьил кутуналди, Дербентда мукьвал вахтара вичихъ 16 гектардин майдан авай “Патриот” парк, ретро-автомобилрин ва Кьиблепатан Дагъустандин дишегьлийрин гъилин сеняткарвилерин музеяр кардик акатда.
Шегьердин (гьуьлуьн кьерелай гатIунна Нарын-къеледилайни вине авай “Шамагъажрин там” чкадал кьван канатдин рехъ тухунин проектни гьазурзава. Шегьердин администрацияда чаз малумарайвал, канатдин рекьин яргъивал 2800 метрдиз барабар жеда. Са сятдин вахтунда анай 500 касдивай Жалгъан дагъдин этегрив кьван физ жеда.
Канатдин рекьер тухунин жигьетдай тежриба авай “Канатдин милли рекьер” компаниядин кьилин инженер Дмитрий Нагулевича лугьузвайвал, проектдин бинедаллаз гьуьлуьн кьере ва Нарын-къеле цитаделдин мукьув кьве станция эцигна кIанзава. И карди, канатдин рекьи, туристар патал къулайвилер арадал гъида ва шегьерда кIвалахдин чкаярни артухарда.
Шегьерда, алай вахтунда авайбурал алава яз, туриствилин мад са маршрут кардик кутунин кIвалахарни йигин еришралди кьиле физва. Гьуьлуьн кьерелай гатIунна, Низами Генжевидин паркунай Нарын-къеле цитаделдал кьван физвай и цIийи маршрут Дербентдин мугьманар ва туристар патал генани маракьлуди жеда.
Туриствилин цIийи маршрут физвай Мамедбегован куьчедин къерехдай тIуз къванцин гурарин кIвачин рехъ туькIуьрзава ва и куьче бульвардиз элкъуьрунин кIвалахарни гегьеншарнава.
Нариман Къарибов
