Дербентдин ракьун рекьин узелдин зегьметдин ва женгинин КIвалин (виликан ракьун рекьин тарихдин музей) заведующий, шаир ва мухбир Гьажиагъа Мегьамедшерифова, и мукьвара гуьруьшмиш хьайила, заз музейдин (ша чна аниз гьакI лугьун) гзаф маракьлу цIийи экспонат “Сталиназ пишкешрин ктаб”  (“Книга подарков Сталину”) къалурна. Ам музейдиз Дербентдин ракьун рекьин ветеранрин советди вахканвайди я.

Ктабдин чинар тупIалай авурла, малум хьайивал, ам Ватандин ЧIехи дяведин женгер куьтягь жедалди са йис амаз — 1944-йисан 12-майдилай гатIунна, Дербентдин локомотиврин депода гъилелди кхьена акъуд­завайди тир.

Ингье и маракьлу ктабдай са шумуд делил:

“03.06.44-йис. 685-84-нумрадин паровоздин машинист А.В.Теслюковалай: жуван бригададин член тир Н.Кьасумовахъ галаз санал (машинистдин куьмекчи) чна, комплексный бригада эвезуналди, гзаф четин кIвалах вахтундилай вилик тамамарна ва 195 манат кьенятна”.

“Деподин начальник Величко”

“18.06.44-йис. “Величко В.П., деподин на­чальник: деподин са десте работникрихъ галаз санал шегьердин­ мукьув гвай майишатда субботник тешкилуналди 300 манатдин кIвалахар тамамарна”.

“30.07.44-йис. Автомоторный цехдин бригадир Г.И.Сидоренкоди деподин са десте работникрихъ галаз санал асул кеспидикай азад вахтунда 16 тонн металлолом  вагондиз яна ва 150 манат кьенятна”.

“Деподин начальник — Величко, парткомдин сек­ре­тарь — Кучеров, профкомдин председатель — Маликов”.­

Къейдна кIанда хьи, музейдиз и мукьвара ветеран­рин советди вахканвай тарихдин документрик “КПСС-дин ХХII Съезддиз пишкешар” гъилин ктабни ква.

“И кьве ктабни, — лугьузва Гь.Мегьамедшерифова, — Дербентдин ракьун рекьин колледжда ва шегьердин мектебра профориентациядин кIвалахда ва ватанпересвилин руьгьдаллаз тербияламишунин жигьетдай тарсарани ишлемишиз жеда”.

Нариман Къарибов