Россиядин экономикадин рекьяй вилик финин министерстводи СКФО вилик тухунин госпрограммадай кьуд регион патал алай йисуз такьатар артухарун теклифзава, хабар гузва ТАСС-ди. Абурун арада Дагъустан, Кеферпатан Осетия, Кабардино-Балкария ва Чечня ава.
Проектдал асаслу яз, Дагъустандиз чара ийизвай такьатар 741 миллионни 600 агъзур манатдилай 826 миллионни 171,8 агъзур манатдал кьван гзафарун теклифзава. Кеферпатан Осетиядиз — 635 миллионни 140 агъзур манатдилай 990 миллионни 336 агъзур манатдал кьван, Кабардино-Балкариядиз — 500 миллион манатдилай 653 миллионни 693,5 агъзур манатдал кьван, Чечнядиз — 885 миллион манатдилай 1 миллиардни 485 миллион манатдал кьван.
2025-йисалди СКФО вилик тухунин госпрограммадик Кеферпатан Кавказ дурумлудаказ вилик фин патал хъсан шартIар арадал гъунихъ, инвестицияр желбунин крарин дережа хкажунихъ, бейкарвал тIимиларунихъ ва промышленный хилериз куьмек гунихъ элкъуьрнавай подпрограммаярни акатзава.
«Лезги газет»
