И мукьвара Сулейман-Стальский райондин Шихидхуьре мини-футбол ва волейбол къугъвадай спортдин майдан шад гьалара ачухуниз талукьарнавай мярекат кьиле фена.
Мярекатда Сулейман-Стальский райондин кьил Н.Абдулмуталибова, райондин депутатрин собранидин председатель Ш.Мегьамедханова, райадминистрациядин жавабдар къуллугъчийри, “Шихикентский” АСП-дин кьил Ш.Ханбалаева, “Кьасумхуьруьн СМУ” ООО-дин генеральный директор З.Гьажимирзоева, хуьруьн агъсакъалрин Советдин председатель Къ.Пирвелиева, какахьай единоборствойрай дуьньядин 3 сеферда чемпион З.Келбялиева, СМИ-рин векилри ва хуьруьнвийри иштиракна.
Адет хьанвайвал, майдан ачухуниз талукьарнавай шад мярекат багьа мугьманри ва хуьруьн мектебдин аялри яру лент атIунилай башламишна. Сифте гаф Нариман Абдулмуталибоваз гана. Спортдин майдан ачухун тебрикунихъ, адан важиблувал къейд авунихъ галаз сад хьиз, анаг аялринни жаванрин, вири хуьруьнвийрин рикI алай чкадиз элкъведайдахъ умуд квайди къалурна. “Гила райондин Гуьне пата яшамиш жезвай агьалийризни тренировкаяр ва акъажунар кьиле тухудай майдан хьанва. Ина неинки аялривай ва чIехибурувай спортдин ва физический рекьяй чпин устадвал хкажиз, гьакIни машгъулардай ва суварин мярекатарни кьиле тухуз жеда.
Спортдин майданар ачухун Гуьне патан гзаф хуьрерин агьалияр патал зурба вакъиа я. Ам чкайрилай къвезвай теклифар уьмуьрдиз кечирмишунин проектрин сергьятра аваз туькIуьрнава. Виридан къуватар садна, чавай и майдан арадал гъиз алакьна. И жуьредин спортдин объектар райондин хейлин чкайра эцигнава ва и кар инлай кьулухъни давамарда. Мукьвал гележегдин планрик спортдин майдандин патарив аялар къугъвадай чка (парк) эцигун ва Кьасумхуьрелай и патахъ къвезвай рекьин кьве километрда къир цунни ква. Райондин и пата кьве СП-дик акатзавай 7 хуьруьн агьалияр яшамиш жезва. Испика кьве патани яшайишдин объектар авай кьилин куьчеда, 1,5 километрдин мензилда, къир цада”, — лагьана Н.Абдулмуталибова.
Майдан ачухуниз талукьарнавай шад мярекат анал мини-футболдай ва волейболдай Шихидхуьруьнни Испикрин хуьрерин командайрин арада къугъунар кьиле финалди акьалтIна. Турнирдин иштиракчийриз кубокар, медалар, грамотаяр ва пулдин пишкешар гана.
«Лезги газет»
