Малум тирвал, Россиядин Федерациядин Президентдин указрин бинедаллаз 2020-йисуз чи уьлкведа социальный кьилдин пулар гузва. Чи регионда и пулар гузвай гьалдин гьакъиндай 3-августдиз Дагъустан Республикадин Гьукуматдин Председатель Артем Здунов хабардарна.
И мярекатда РД-дин Гьукуматдин Председателдин 1-заместитель Анатолий Къарибова, вице-премьер Рамазан Жафарова, РД-дин Гьукуматдин Председателдин куьмекчи Ленар Сабирова, РД-дин ТФОМС-дин руководитель Ильяс Мамаева ва Россиядин пенсийрин фондунин РД-да авай отделенидин управляющий Мегьамед Исаева иштиракна.
16 йисалди яшарин аялриз социальный пулар гузвай гьалдикай Мегьамед Исаева малумат гана. Ада лагьайвал, республикада аялриз пулар гун давамарзава.
— 2020-йисан 3-августдин делилралди, республикада 622,5 агъзур аялдиз 15,5 миллиард манат пул ганва. И жуьредин социальный пулар къачуна кIанзавай аялрин кьадар 674,5 агъзур кас я. Пулар къачун патал арза вугудай вахт 30-сентябрдиз акьалтIзава, — лагьана Исаева.
РД-дин Гьукуматдин Председателди талукь идарайрин руководителар ва къуллугъчияр и месэла гьар йикъан гуьзчивилик кутунин ва пулар къачудай ихтияр авай гьар са хизандив абур агакьдайвал авунин патахъай тагькимарна.
Мегьамед Исаева гьакIни малумарна хьи, ЧIехи Гъалибвилин 75 йисан юбилейдихъ галаз алакъалу яз региондин бязи агьалийриз гана кIанзавай пуларни виридав агакьна.
Идалай гъейри, совещанидал 1999-йисан августдин ва сентябрдин вакъиайрин иштиракчийриз гьар вацра гана кIанзавай пуларикайни ихтилат кудна.
Вичин нубатда Ильяс Мамаева “2020 ва 2021-2022-йисара РД-дин ТФОМС-дин бюджетдин гьакъиндай” РД-дин закондин проектдикай малумат гана. Ада лагьайвал, дуьздаказ ва кардин гъавурда аваз тешкилай кIвалахдин нетижада РФ-дин маса субъектриз ТФОМС буржлу яз амукьнач.
«Лезги газет»
