Духтурвилин пеше герекди, гьуьрметлуди, гьа са вахтунда гзаф четинди тирди виридаз чизва. Коронавирусдин инфекция чкIай, инсанрин сагъламвал хаталувилик акатай вахтунда медицинадин хилен работникри, чпин пешедиз вафалувал къалуруналди, югъ-йиф талгьана намуслудаказ зегьмет чIугуна, цIудралди инсанар хаталу тIегъуьндикай хвена. Ихьтин келимаяр чавай Сулейман-Стальский райондин здравоохраненидин работникрикайни лугьуз жеда. Четин вахтунда абурун дурумлу зегьмет къалурун яз, чавай ихьтин мисалар гъиз жеда: Дагъустан Республикадин Кьил Владимир Васильеван Указдалди райондин центральный больницадин терапевтический отделенидин заведующий Эльвира Мирзехановадиз, терапевт Измира Гьабибовадиз “Дагъустан Республикадин лайихлу духтур” лагьай гьуьрметдин тIвар, ЦРБ-дин кьилин духтурдин везифаяр тамамарзавай Жафер Къурбанисмаловаз Дагъустан Республикадин Гьуьрметдин грамота гана, муниципалитетдин 337 медработникдиз чухсагъул малумарна.
Галатун тийижиз зегьмет чIугунай 6 медработникдиз райондин кьил Нариман Абдулмуталибован патай тIварар кхьенвай сятер ва чухсагъулдин чарар, 210 медработникдиз меценат Салман Бабаеван ва минеральный ятар акъуддай “Рычал-су” заводдин патай пулдин пишкешар гана.
Дагъустан Республикадин Кьил Владимир Васильеван Указдалди чухсагъулдин чарар ганвайбурун арада ДаркIуш-Къазмайрин фельдшервилинни акушервилин амбулаториядин заведующий Агъарагьимов Агъаверди Агъарагьимовични (шикилда) ава. Шабагь вахкайдалай ва хуш келимаяр лагьайдалай гуьгъуьниз ЦРБ-дин кьилин духтурдин везифаяр тамамарзавай Жафер Къурбанисмаилова чаз Агъаверди Агъарагьимовакай газетдиз макъала кхьин теклифна.
ФАП ДаркIуш-Къазмайрин юкьвал ала. “Кавказ” шегьредилай ФАП-дал кьван фенвай кьилин куьчеда къир цанва. Анин дарамат кутугайди я, ана михьивал, къайда ава.
Агъаверди Агъарагьимова 1985-йисуз хуьруьн юкьван школа лап хъсан къиметар аваз акьалтIарна. Совхозда кIвалахна. 1986-1987-йисара Советрин Армиядин жергейра къуллугъна.
Гьеле школада кIелзавай йисарилай рикIе духтур хьунин къаст авай Агъавердиди са йисуз Дагъустандин мединститутдин гьазурлухвилин отделенида кIелна. 1989-йисуз ам Дагмедуниверситетдик экечIна ва 1995-йисуз анаг хъсан чирвилер къачуналди акьалтIарна. Са йисуз Дербент шегьердин центральный больницада интернатура фейидалай гуьгъуьниз Агъаверди ДаркIуш-Къазмайрин ФАП-дин заведующийвиле тайинарна. Адан еке чалишмишвилер себеб яз, хуьруьнвийрин игьтияжар ва вахтунин истемишунар фикирда кьуна, 1997-йисуз амбулатория фельдшервилинни акушервилин пунктуниз элкъуьрна.
А.Агъарагьимов и хуьре медицинадин рекьяй кьилин образование къачур сад лагьай кас я.
— Агъаверди Агъарагьимович, гуьзлемишни тавур коронавирусдин инфекциядикай рахазни кIанзавач. ЯтIани хабар кьан: адан нетижаяр хуьре гьихьтинбур хьана?
— КIвалах артухарна, инсанрал гьар са карда сергьятар, къадагъаяр эцигна. Коронавирусдин инфекция чукIун себеб яз, чна хуьре алай йисан 27-мартдилай ахтармишунар тухуз башламишна. Адан нетижада 12 кас кIвалера ва са кас стационарда сагъар хъувуна. Инфекциядик рагьметдиз фейи ва алай вахтунда адак начагъзавай кас хуьре авач. ЯтIани чи медработникри игьтият квадарнавач, инфекция чукIунин вилик пад кьадай серенжемар кьабулзава, чи медработникар халкьдин арада ава.
А.Агъарагьимова чаз лагьайвал, ФАП-да 8 медработникди кIвалахзава. Коронавирусдин инфекциядин вахтунда абуру галатун тийижиз зегьмет чIугуна, инфекциядикай цIудралди хуьруьнвияр хвена. Абуруз аферин ва баркалла.
ФАП-дин работникри 2500 касдиз медицинадин рекьяй къуллугъзава. Ам дарманралди, герек маса шейэралдини таъмин я.
ДаркIуш-Къазмайрал командировкада авайла, чна хуьруьнвийрихъ галазни ихтилатар авуна, А.Агъарагьимовакай абурун фикирар чирна.
— Агъаверди Агъарагьимович Худади духтур хьун патал халкьнавайди я, — лугьузва пенсияда авай муаллим, лезги писателрин Союздин член Эйзудин Сайдумова. — Дарманрикай, рапарикай хьиз, Агъавердидин кьезил гъиликай, ширин мецикайни начагъ касдиз чара-дава жезва. Ам неинки и хуьре, гьакI дагъдин куьгьне ДаркIушрин хуьре яшамиш жезвай инсанрин сагъламвал хуьнин къаравулдани акъвазнава. Вичин хиве авай везифайрив рикI гваз эгечIзавай Агъаверди Агъарагьимовичаз даркIушвийри аферин, баркалла лугьузва. Адан, гьакIни амай медработникрин намуслу зегьметдин нетижада хуьруьн ФАП райондин медицинадин лап хъсан идарайрин арада ава.
2010-йисалай А.Агъарагьимов Дагъустан Республикадин здравоохраненидин отличник я. Адахъ гьакIни намуслу зегьметдай ганвай РФ-дин здравоохраненидин министерстводин, “Красный Крестдин” обществодин, ЦРБ-дин руководстводин гьуьрметдин грамотаяр ава.
— Жуван кIвалахдилай хуьруьнвияр рази хьун зун паталди виридалайни чIехи шабагь я, — лугьузва Агъарагьимова.
Чаз малум хьайивал, духтурвал и хизандин пеше я. Медицинадин училище акьалтIарнавай Агъавердидин уьмуьрдин юлдаш Ниябат Абдужалиловнадини хуьруьн ФАП-да регистратор яз кIвалахзава.
Ич ичин тарцивай яргъаз аватдач, лугьузва бубайрин мисалда. Агъаверди ва Ниябат Агъарагьимоврихъ 4 руш ава. Абурукай сада — Ифриза — пединститут акьалтIарна, акьалтзавай несилдиз чирвилер ва тербия гузва. Амай рушар диде-бубадин пешедал ашукь хьанва. ИкI, медучилище акьалтIарнавай Миланади Хив райондин Фригърин хуьре участковый медсестра яз кIвалахзава. Наимади Саратов шегьердин медицинадин университетдин педиатрический факультетда (6-курсуна) кIелзава. Лап хъсан къиметар аваз 11-класс акьалтIарнавай Сиясатан къастни Саратовдин медуниверситетдик экечIун я.
Чи рикIел райондин кьил Нариман Абдулмуталибова медработникрив муниципалитетдин грамотаяр вахкудайла лагьай гафарни хтана: “Вири четинвилериз дурум гана, коронавирусдин инфекциядихъ галаз женг чIугвадайла, медработникар вилик жергейра хьана, чи агьалийрин сагъламвал хуьн, гьатта абур ажалдин къармахрай акъудун патал абуру намуслудаказ зегьмет чIугуна. Им пешедиз вафалувал къалурун, халис игитвал я”.
И келимаяр Агъаверди Агъарагьимовазни талукь я.
Асият Мирзалиева,
РД-дин культурадин лайихлу работник,
Хазран Кьасумов,
РФ-дин журналистрин Союздин член
