КцIар шегьердин госдрамтеатрда зи тамаша эцигзавай береда заз а вахтунда чкадин медениятдин  ва эдебиятдин рекье чпин алакьунар къалуриз чалишмишвалзавай вири инсанар чир хьанай. Абурун арада, зи фикирдай, сегьнедин уьмуьрда бажарагълу чка кьадай ва еке машгьурвилер вилик квай са жегьил артистни акунай. Анлай инихъ хейлин вахтар алатна. И гатфариз за а театрдиз мад кам къачуна.Театр зи рикI алай макан я.

Ана къуллугъзавай гьар са кас заз багьа я. Ина фадлай зун гуьзетзавай режиссёр Багъираз акьван хвеши хьана хьи, театрдиз ада за цIийи пьеса гъун тIалабна. И береда артистрин арада заз таниш  тир ва вичик еке умуд кутур жегьил акунач. Зун адан кьисметдин гуьгъуьна гьатна.

Магьиров  Метлеб  Шихрагьимович. Ам уьнуьгъви Шихрагьиманни Къизилгуьлан хизанда 1981-йисуз дидедиз хьана.Адан аялвал датIана музыкадин алатрин сесерик акъатна.ЧIехи буба Шихвалед харат устIар тир. Азад вахтун­да ада, рикIиз хуш нагъмайрал машгъул жез, чуьнгуьр хурал кьадай. И береда бицIек Метлеб низ чида шумуд сеферда адан ван кутазвай алатдиз гьикьван дикъетдивди тамашнайтIа. Ахпа Мет­леб Шихрагьиман къвалал алкIиз хьана, ада гитара ядайла. Шихрагьимни, вичин буба хьиз, устIар тир, анжах — эцигунрин ре­кьяй.  Адан рикIни музыкадал ашукьарайди буба тир.

Магьирован хизанда Метлеб ма­нийрал, кьуьлерал рикI алаз чIехи хьана. Гьеле мектебда кIелдай йисара ада шиирар кхьиз башламишнай. Ахпа яваш-яваш а чIалариз  музыка теснифиз, ада а манияр межлисра тамамариз хьана. «Шагьнабат» ансамблдихъ галазни кIва­лахна. Метлебан рикI искусстводал па­ра алай, ада са шумуд йисуз КцIар ­ше­­­гьердин госдрамтеатрда артиствиле кIва­лахна.Сегьнедал Метлеба тамамарзавай къаматар (ролар) гьвечIи­бур тир­тIа­ни, жегьил артистдин вилерикай гьамиша еке ва машгьур ролра къу­гъун карагдай. Герек атайла, ада, лезги халкь­дин манийрал рикI алаз, абур лугьудай, лазим чкадал “Лезгинка” кьуьл дестеда виридалайни хъсандиз тамамардай. Адан рикI манийрал пара алай. Музыкадин алемда авай Метлебаз вири дуьнья, инсанар гуьзелдиз аквадай. Садлагьана Метлебан кьисметда дегишвилер арадал атана. Ам искусстводикай яргъа хьана. Аквар гьаларай, адан пер хана…

Са шумуд йисуз Россиядин Кеферпатан меркезда эцигунрин карханайра вичин бригадани галаз кIвалахна. Ахпа ругуд йисалай Метлеб КцIариз хтана. Ремонтрин кIвалахар давамариз са шумуд йис я. Амма Метлеб яратмишунрал рикI алаз яшамиш жезва.

Азад вахтунда Метлеб хизан, аяларни галаз тIебиатдал физва. Адан дикъет­лу вилери вири гуьзелвал вичел желбзава. Гьа са вахтунда са бязибуру тIе­би­атдиз гузвай зиян акурла, Метлеб фикир­ри тухуда. Актервилин рекьяй вири алакьунар, буй-бухах, яратмишунрани  ви­чин­ хсуси хатI авай Метлеба анжах теа­трда ва я кинода кIвалах­най­тIа, заз  ва ма­са ксаризни хуш жедай. За умуд кутаз­ва хьи,  Магьиров Метлеб хайи  театрдин сегьнедиз мад экъечI­да ва и цIарар кхьизвай автордин тамашадани, белки, кьилин ролда къугъвада. Геле­жегда низ чида ам къугъвазвай ролар гьи театрдин сегьнейрай чаз ­ак­ва­датIа. Вири вилик ква. Адахъ и ре­кьяй еке бажа­рагъ авайди ярар — дустари ва гьакI теа­трдин режиссер Багъирани тестикьарна…

Метлебан метлеб ихьтин гафарикай хкатзава: инсандин метлеб уьмуьрда ин­санвилин къанунралди яшамиш хьун, вичин халкьдин мярекатра иштиракун ва асул гьисабдай, лазим хьайитIа, халкь паталди чанни гуз гьазур хьуникай ибарат­ я. Къуй чахъ бажарагълу, руьгьдиз гуьзел, Метлеб хьтин викIегь инсанар   па­ра хьурай. Зи япара  адан  гуьзел манийрин сес ава. А сесери заз илгьам гузва.

Бикеханум  Алибегова